Яныш әллә ни ҙур түгел, 400-ҙән ашыу кеше йәшәй, нигеҙҙә, өлкә­нәйә барыусылар. Шулай ҙа хеҙ­мәттә сыныҡҡан быуын дәртен һүрелтмәй көн итә. Мәҙәни тор­моштоң гөрләп барыуын үҙ күҙ­ҙәребеҙ менән күреп ышандыҡ. “Беҙҙә халыҡты берләштергән саралар даими уҙғарыла”, – тиеү­ҙәре лә раҫ булып сыҡты. Мәҫәлән, “Һаумыһығыҙ, ауылдаштар!”, “Моң­дар ҡайтһын ауылға!” кеүек һуңғы ваҡытта йыш уҙғарылған саралар олоһон да, кесеһен дә дәррәү йыя. Ауылды йәмләп, ҙур мәсет ултырыуына ла иғтибар иттек. “Күп кеше йөрөмәһә лә, тәрбиә биреү урынына йәштәрҙең йышыраҡ аяҡ баҫа башлауы һәйбәт”, – тинеләр.
Әйткәндәй, Аллаһ йортон һал­ды­рыуға ошо төбәктә тыуып үҫкән шағир һәм композитор Миҙхәт Әбделмәнов көс түккән. Был хаҡта айырым бер ғорурлыҡ менән хәбәр иттеләр. Мәҙәниәт йорто менән бер ҡыйыҡ аҫтында урынлашҡан китапхана ла исем өсөн генә асылмай. Ғөмүмән, Янышта халыҡтың йәшәйешен мәғәнәле итергә, сағыу кисәләр үткәреп йәмләргә тыры­шыу­ҙарына ышанылды. Ғүмер­ҙәренең һигеҙенсе тиҫтәһен ҡыу­ған ағай-апайҙар ҙа әртис­лектәрен ташларға уйламай икән, театр түңәрәгенә ихлас йөрөйҙәр, тинеләр. Ә мәҙәниәт йорто директоры Мәхмүт Ибраһимов хаҡында әйтеп тораһы ла түгел – йәне-тәне менән сәнғәт донъяһына мөкиббән кешеләрҙең береһе. Уның “Алтын Урал” конкурсында ҡатнашыуы менән дә ғорурланалар.
Яныш ауыл хакимиәте башлығы Ирек Шәйәхмәтов әйтеүенсә, “Айыҡ ауыл” республика конкурсына ҡушылырға теләк белдерер алдынан һәр мәсьәләне ете ҡат үлсәгәндәр. Теләк тыуыу менән генә түгел бит, ошо төбәктә көн иткән һәр кемдең сараның маҡса­тын, мөһимлеген тәрән аңлауы ла кәрәк. Иң элек депутаттар менән кәңәшләшелгән, артабан халыҡ менән һөйләшеп, бер ҡарарға киленгән.
Эште “иҫерткес эсемлек эс­мәйек!” тигән саҡырыуҙан түгел, ә сәләмәт тормоштоң өҫтөнлөгөн күрһәтеүҙән башлағандар. Күмәк халыҡ ҡатнашҡан байтаҡ сара ойошторолған. Йәштәрҙе һәм үҫ­мер­ҙәрҙе заман афәттәренән йолоп ҡалыу бурысы тәүге урынға ҡуйылған. Йөктө барыһы бергә, йәғни мәктәп, ауыл хакимиәте, китапхана һәм клуб хеҙмәткәрҙәре берҙәй тарта.
Шырлыҡ ауылындағы социаль-мәҙәни үҙәк тышҡы яҡтан күр­кәмлеге менән йәлеп итеп торһа, бина эсендә һәр кем зауы­ғына ярашлы сарала ҡатнаша ала. Китапханасы Зөһрә Ибраһимованан да уңғандар, йәштәрсә дәрт менән гөрләтеп алып бара ул һәр эште.
Ҡунаҡ аҙ ултырыр, күп һынар, тиҙәр бит. Ҡыҫҡа ғына ваҡыт эсендә лә атҡарылған эштәрҙең отчет өсөн булмауына инандыҡ. Колхозда эшләгән, фиҙакәр хеҙ­мәт­тәре орден-миҙалдар менән баһаланған ауылдаштарын да, һуғыш ветерандарын да берҙәй хөрмәтләйҙәр бында. Шырлыҡ­тар­ҙың музейы менән танышҡандан һуң, һис һүҙһеҙ, һәр кемдең үҙҙә­рендә лә ошондай мөйөш булдырыу теләге тыуалыр. Уларҙағы кеүек йәш ғаиләләр клубы ла һәр ҡайҙа юҡ. Балалар буш ваҡытын файҙалы үткәрһен өсөн юлын да, йыһазлан­дырыуға аҡса ла табып була икән. Һөҙөмтәлә кескәйҙәр яҡты, сағыу бүлмәлә рәхәтләнеп шөғөлләнә ала.
Әйткәндәй, төбәктә сәләмәт тор­мошҡа юл әле генә алынмаған. Былтыр, мәҫәлән, райондың ҡа­тын-ҡыҙҙар советы ағзалары, айыҡ­лыҡҡа әйҙәп, автомобилдә ошо яҡтан да үткән. Яныш ауыл Со­веты биләмәһендәге ауылдар “Айыҡ ауыл” республика бәйге­һендә еңерме-юҡмы – уныһы тәү­маҡсат түгел. Шулай ҙа иң мөһиме -– сәләмәт йәшәүҙең өҫтөн­лөгөн үҙ күҙҙәре менән күреп, үҙҙәре миҫалында ышаныуҙа ҡиммәте.