Бәйгеләрҙә сапҡан ярһыу аттай,
Һис тә тынмай изге йөрәгең.
Ҙур хеҙмәттә үтә тормош юлың,
Балаларың — оло терәгең.
Ошо шиғыр юлдарындағылай иҫ белгәндән бирле бер минут та тыныслыҡ белмәгән изге йөрәкле Гөлсәсәк Тураева хаҡында һорашҡас, “Ә-ә, теге Яманһарының Гөлсәсәген әйтәһеңме, ҡаратырыш, шул хәтлем ныҡыш бит ул. Һис арыу белмәй, әллә таштан яралған инде”, — тигәйнеләр. Уйынлы-ысынлы әйтелгән был һүҙҙәрҙең хаҡлығына былтыр “Йыл уҡытыусыһы”на әҙерлек мәлендә ныҡлап ышандым.
Ғаиләлә бер-бер артлы үҫеп килгән туғыҙ бала... Мал-тыуар, ҡош-ҡорт, ауыл тормошоноң иртәнге ҡараңғынан кискә тиклем бөтмәҫ эше... Йәштән ҡул араһына кереп үҫә Гөлсәсәк. Мәктәптә уҡығанда төрлө түңәрәктәргә йөрөй, ҡул эштәре менән шөғөлләнә. Байрам һайын класташтары менән концерт, спектаклдәрҙә ҡатнаша. Ләлә апалары уларҙы оҫта итеп бейергә, сигергә, йырларға, шиғыр һөйләргә өйрәтә, хатта Өфөгә телевидениеға сығыш яһарға ла алып бара.
Бәләкәй ҡыҙҙың йөрәгендә тап ошо йылдарҙа — мәрхәмәтле, изге йөрәкле Ләлә апаһы аша — уҡытыусы һөнәренә һөйөү уяна ла инде.
IХ класты тамамлағас, яҡты теләк уны Салауат педагогия училищеһына алып килә. Әүҙем ҡыҙ бында ла йәмәғәт эштәренән ситтә ҡалмай.
Ҡулына диплом алғас, Гөлсәсәк хеҙмәт юлын Көйөргәҙе районының Ҡалта ауылында башлай. Өс йыл дауамында башланғыс кластар уҡытыу менән бергә ауылдың агитаторы, комсоргы була. Ауыл халҡы, балалар араһында абруй яулап өлгөрә, ситтән тороп Стәрлетамаҡ педагогия институтына уҡырға инә.
Тормош дауам итә. Гөлсәсәк, кейәүгә сығып, тыуған ауылы Яманһарыға әйләнеп ҡайта. Бер-бер артлы Фиданы, Гөлфирәһе донъяға килгәс тә, ҡатын өйҙә тыныс ҡына ятмай, бер-ике айҙан кире яратҡан эшенә сыға. Мәктәп директоры Рәмилә Иҫәнғолова йәш белгескә һәр яҡлап ярҙам ҡулы һуҙа. Уҡытыусы эшенең нескәлектәренә өйрәтеүенә Гөлсәсәк Зәки ҡыҙы уға сикһеҙ рәхмәтле.
Артабан яҙмыш Гөлсәсәк Зәки ҡыҙын Айсыуаҡҡа, Маяҡ ҡасабаһындағы интернатҡа, унан 8-се мәктәпкә илтә. Ҡайҙа эшләһә лә, тырыш хеҙмәттән йәм табып йәшәй ул.
Ғүмер үтә. Инде балалары үҫеп, улы Санкт-Петербургта эшләп йөрөй, машина алып ҡыуанды, хәҙер өй һалып, кәләш әйттермәксе. Гөлфирәһе Өфө дәүләт авиация техник университетының III курсында уҡый. Ире Мансур ҙа үҙе һымаҡ тырыш, эш өсөн тыуған кеше.
Күмәк балалар араһында үҫеп, бала яратҡан тынғыһыҙ Гөлсәсәк Радик исемле етем малайҙы ла ҡарарға алды. Хәҙер ул да ата-әсәһенең ҡул араһына керә башланы, IV класта тырышып уҡый, спорт менән шөғөлләнә.
Ҡарама беләккә, ҡара йөрәккә тигәндәй, Гөлсәсәк Зәки ҡыҙының был донъяла белмәгән эше бармы икән? Былтыр башҡорт теле һәм әҙәбиәте уҡытыусыларының ҡала конкурсында ҡатнашып, беренсе урынды яулағас, ең һыҙғанып республика ярышына китте. Унда ла һынатманы — бығаса бер ҡасан да булмағанса, бер түгел, ике номинацияла еңеү яулап, бүләктәр менән шатланып ҡайтып инде. Башҡортостан Мәғариф министрлығының һәм “Башҡортостан уҡытыусыһы” журналының Маҡтау грамоталары — уҡытыусының ныҡышмалы хеҙмәт емеше, туҡтауһыҙ эҙләнеү һөҙөмтәһе ул.
Гөлсәсәк Зәки ҡыҙы үҙ бурысына һәр саҡ яуаплы ҡарауы, кешеләрҙе яратыуы, ярҙамсыл булыуы, эшсәнлеге менән хөрмәт ҡаҙана. Үҙ эшен, балаларҙы яратҡан педагогтың дәрестәре һәр ваҡыт йәнле үтә. Киң күңелле, кешеләргә ҡарата иғтибарлы, бөгөнгө эште иртәгәгә ҡалдырмай, гел генә яҡшы ниәттә йәшәүсе Гөлсәсәк Зәки ҡыҙына артабан да бөтмәҫ-төкәнмәҫ дәрт, һаулыҡ теләге килә.