Бүтән мәктәптәрҙе ҡы­йыр­һытырға те­лә­гәндән түгел, ләкин гимназияны беҙ өл­гөлө уҡыу йорто тип ҡабул итәбеҙ. Икенсе төрлө әйткәндә – элиталы мәктәп. Ләкин минең һорау хөр­мәтле мөғәллимдәр ара­һында ҡаушау тыуҙыр­ған кеүек булды. Ахырҙа дәфтәр тикшереп ултырған бер уҡытыусы, башын ҡалҡыт­май ғына, ҡул күтәрҙе:
– Мин алдырам! Йыл һайын.
Рәйлә Аҫылбаева булып сыҡты ул (һу­ңынан белеүебеҙсә, гимназия директоры Гәүһәр Назарова ла йортона алдыра икән).
– Әсәйем дә уҡытыусы булып эшләне, ғүмер буйы матбуғаттан айырылманы, – тине Рәйлә Әхәт ҡыҙы. – Уҡытыусы, биге­рәк тә башҡорт гимназияһында эшләгән педагог, милли матбуғатһыҙ йәшәй ҙә алмаҫҡа тейеш!
Тик гәзитте алдырмағас, милләттең бөгөнгө хәле һәм “Башҡортостан” гәзи­тенең уны нисек яҡтыртыуы тураһында һөйләшеү килеп сыҡманы. Әлеге беҙ алып килгән һандың аҙаҡҡы битен күрһәтәм: Салауат ҡалаһындағы 24-се мәктәптең беҙ­ҙең гәзитте даими алдырып барған уҡы­тыусылары сығыш яһаған унда. Мә­ҡәлә “Ҡиммәтлеге ҡурҡытмай” тип атала.
Шул саҡ уҡыу-уҡытыу бүлеге мөдире Райхан Иҙрисова урынынан торҙо:
– Әйҙәгеҙ, беҙ ҙә тотош коллектив менән яҙылайыҡ! Гимназия бит беҙ, эш ха­ҡы милли матбуғатҡа яҙылырға мөм­кин­лек бирә, кемдәр аҡса йәлләй, ана гә­зиттең “Йома” һаны ярты йылға 500 һум са­маһы ғына тора, халҡыбыҙҙың милли матбуғатына шулай ҙа ярҙам итә алмаһаҡ...
Ҡаршы килеүселәр табылманы. Иҫән­ғол башҡорт гимназияһы гәзитте алдырып ҡына ҡалмаҫ, был баҫма күтәргән проблемалар буйынса һөйләшеүҙәрҙә лә әүҙем ҡатнашыр – беҙгә яҙышыр, гәзиттең сайтында мәҡәләләргә ҡарата фекер­ҙәрен белдереп торор, тип өмөт итәбеҙ. Юғиһә, улар үҙ уҡыусыларына: “Әүҙем йәшәгеҙ, битараф булмағыҙ, белемегеҙҙе үҫтереү өҫтөндә даими эшләгеҙ!” – тип өйрәтә алырмы?


.