Исламдың терәктәренең береһе булған иман тотош тереклек донъяһын тотоп тора. “Изге Ҡөрьән нуры” йыйын­ты­ғы авторҙары яҙыуынса, ул “бүлмәне генә яҡтыртып торған шәм түгел, яҡты нуры тышҡа ла тарала”. Дин дөрөҫ юлды һайларға өйрәтә. “Кешене ике нәмә һәләкәткә илтә: үтә фә­ҡирлектән ҡурҡыу һәм һауалы булыу, – тип әйтеп ҡалдырған бер күренекле дин әһеле. – Үҙегеҙгә генә һоҡланыуҙан һаҡ булығыҙ. Ялғанлыҡҡа яҡын бармағыҙ. Улар – шайтан ҡулын­дағы төп ҡорал”.
Совет осоронда әлеге Ишембай районы биләмәһендә урынлашҡан мәсет манараларын ауҙарған, был эштә уларға ярҙам күрһәткән кешеләрҙең фани донъялағы яҙмыштары менән ҡыҙыҡһынып, шуны белдем: уларҙың барыһы ла тип әйтерлек ҡаты ғазаптарға тарыған, гонаһтарының эҙемтәһе ғаилә ағзаларына ла күскән.
Иман йорто – доға ҡылыу, намаҙ уҡыу, изгелек таратыу урыны. Әл-хәмдү лил-ләһ, һуңғы йылдарҙа беҙҙең районда ла мәсеттәр күпләп һалынды. Иман йорто булған ерҙә йәш быуынды тәрбиәләү, күңелдәргә иман орлоғо һибеү бермә-бер еңелләшә.
Быуындар бәйләнешен нығытыу, мосолмандарҙың көс-ҡеүәтен арттырыу, тормошобоҙҙоң именлеген тәьмин итеү маҡсатында ҡулға-ҡул тотоношоп, ярҙамлашып йәшәйек, иншаллаһ. Киләсәктә манаралар ауҙарып йөрөргә яҙмаһын, Аллам һаҡлаһын.