Борондан шулай булған бында. Ана бит, ата-баба йылғаның исемен дә Майлы тип ҡушҡан. Эргәлә генә ятҡан Аҡҡондоҙ ауылы аҡһаҡалдары әйтеүенсә, һимеҙ мал эс-ҡарынын йыуғанға шулай аталмыш, имеш. Бөгөн дә, башҡа тарафтарҙа һарыҡ­сылыҡҡа иғтибар кәмегән бер осор­ҙа, ейәнсуралар быны, киреһенсә, ауыл хужалығы тармағының төп йүнәлеше иткән. “Маяҡ” хужалы­ғында ғына ла 1 700-ҙән ашыу аҫрала, бәрәстәр һаны мең ярымға етә. Ә шоферҙар “Семиколенка” тип йөрөткән ете быуынлы тау итәктәрен 700-гә яҡыны иңләй, 500-ләп бәрәс быуын нығыта.
— Был яҡтар һарыҡсылыҡ менән шөғөлләнеүгә ҡулай, — ти хужалыҡ етәксеһе урынбаҫары Эдуард Тажиев.
Малсылыҡҡа килгәндә, “Маяҡ” хужалығында шулай уҡ һыйыр һәм таналарҙы яһалма ҡасырыу буйынса үҙәк булдырыу өсөн күп эшләнә. Ошонда уҡ районда мөһим инвестиция проекты — һарыҡсылыҡты үҫтереү муниципаль программаһы тормошҡа ашырыла. Уны Баш­ҡортостан Президенты Рөстәм Хәмитов та хуплаған. Дөйөм инвес­тиция йәлеп итеү күләме 65,5 миллион һум тәшкил итә. Әле про­грамманың өсөнсө этабы ғәмәлгә ашырыла, ул 600 баш тоҡомло һа­рыҡ, техника алыуҙы, ҡуралар төҙөү һәм йүнәтеүҙе, биләмәне төҙөк­ләндереүҙе үҙ эсенә ала.
Беҙ барғанда көтөүсе Рафаэль Тоҡомбәтов һарыҡтарын утарға төшөрә ине. Улар Иншар Әминев менән өсәр тәүлек алмашлап эшләй икән. Рафаэль әйтеүенсә, эште яҡшы ойошторғас, ял итергә лә ваҡыт ҡала. Малдар бер тәртипкә өйрәнеп, үҙ юлын белә. Әйтерһең, тиҙҙән йылы ҡураларға индерелеп, килтерелгән әҙер аҙыҡты таптырыр көндәре яҡынлашыуын һиҙә төҫлө...