Углеводород өлкәһендәге яңы­лыҡтарға арналған сара Рәсәй Президенты Владимир Путин менән Ҡаҙағстан Президенты Нурсолтан Назарбаев рәйеслегендә үтте. Унда нефть һәм газ тармағындағы заманса технологияларҙы ғәмәлгә инде­реү мәсьәләләре тикшерелде. Форумда төрлө министрлыҡ һәм ведомство етәкселәре, төбәк башлыҡтары һәм ҙур бизнес вәкилдәре ҡатнашты.
Бындай юҫыҡтағы осра­шыу­ҙар йыл һайын ойошторола. Әле­гә тиклем ул былтыр ноябр­ҙә Екатеринбургта үткәйне.
***
Төбәк-ара хеҙмәттәшлек форумында Башҡортостан Президенты Рөстәм Хәмитов һәм Аты­рау өлкәһе акимы Баҡ­тыҡужа Измөхәмбәтов Рәсәй Президенты Владимир Путин менән Ҡаҙағстан Президенты Нурсолтан Назарбаевтың алдында сауҙа-иҡтисади, фәнни-техник һәм гуманитар өл­кә­ләрҙәге хеҙмәттәшлек тура­һындағы килешеүгә ҡул ҡуйҙы.
Документ иҡтисадтың химия һәм нефть химияһы сәнәғәте, машиналар эшләү, транспорт һәм ауыл хужалығы кеүек тар­маҡтарында үҙ-ара бәйлә­неш­тәрҙе нығытыуҙы күҙ уңында тота. Яҡтар етештереү-техник тәғәйенләнештәге әйберҙәр, көн­дәлек тауарҙар менән ал­­машыуҙы әүҙемләштерергә ниәт­ләй. Бынан тыш, килешеү төбәктәр араһындағы фәнни һәм гуманитар хеҙмәттәшлекте үҫтереүгә, шул иҫәптән бер­лектәге тикшеренеү проекттарын, белем биреү һәм йәштәр программаларын тормошҡа ашырыуға, мәҙәни алмашыуға, туризм һәм спорт өлкәһендә һөҙөмтәле бәйләнештәргә булышлыҡ итәсәк.
Әле Башҡортостандың Астана, Павлодар һәм Аҡтүбә өлкәләре менән хеҙмәттәшлеге әүҙем үҫә.