– 1990 йылда Ҡаңны-Төр­кәйгә эшкә килдек. Бөгөн­гөләй хәтерҙә: клуб иҫке, халыҡ әллә ни йөрөмәгәнгә күрәлер инде, мәҙәниәт йор­то ихатаһына кәзә-быҙауҙар хужа булып алған. Эс бо­шор­ғос күренеш. Кешеләрҙе нисек мәҙәниәт усағына ылыҡ­тырырбыҙ икән, тип баш ватабыҙ, борсолабыҙ, — тип хәтерләй тәүге хеҙмәт көндәрен Башҡортостандың атҡаҙанған мәҙәниәт хеҙ­мәткәре Марат Кәримов.
Борсолоуҙар юҡҡа була. Халыҡ ошондай егәрле хеҙмәткәрҙәрҙе күп­тән көтөп торған тиерһең, йәш-елкен­сәге лә, ҡарт-ҡо­роһо ла мәҙәниәт усағында ҡайнаша, һәләттәре менән ауылдаштарын ҡыуандыра башлай.
– Күп тә үтмәй “Заһиҙә” фольк­лор бейеү ансамблен ойоштороп ебәрҙек. Ҡатын-ҡыҙҙарыбыҙ тамам “ағыу­лан­ды” сәхнә сире менән, — тип көлә Заһиҙә Кәримова. — Тырышлыҡ бушҡа китмә­не: 2008 йылда “халыҡ ансамбле” исемен яуланыҡ. Бейеү тигәндә ҡайһы берәү­ҙәр ауырыған еренән то­роп, һауығып китә хатта. Йырлап-бейеп сәхнәнән төш­мәгән Рәйсә апай Яҡу­поваға кем 75 йәште бирер?
Былтыр гөрләтеп “Заһи­ҙә”нең егерме йыллыҡ юбилейын билдәләгән кол­лек­­- тив. Стәрлетамаҡ, Бишбү­ләк, Дәүләкән, Бәләбәй, Күмертау, Ишембай райондары, Санкт-Петербург сәх­нә­ләрендә бейеп, халыҡтың хөрмәтен яулаған ансамбль республикала үткәрелгән сәнғәт байрамдарында, бөтә төр конкурстарҙа әүҙем ҡат­наша. Бынан бер нисә йыл элек Салауат йыйынында фольклор ансамблдәре араһында ойошторолған бәйгелә гран-приға эйә булып яҡташтарын һөйөн­дөр­гән улар. Быйыл да ғо­рурланырлыҡ уңыштары мул ғына.
— Дәүләкәндә “Бауырһаҡ” байрамында ла ҡаңны-төр­кәйҙәр йөҙҙө ҡыҙарт­маны, дүрт диплом алып, һөйөнөп-дәртләнеп ҡайттыҡ, — ти мәҙәниәт йорто етәксеһе.
– Бишбүләктә “Тылсымлы моңдар” төбәк-ара башҡорт халыҡ ансамблдәре конкурсында ла һынатманыҡ, абруйлы икенсе урынға лайыҡ булдыҡ, — тип өҫтәй Заһиҙә ханым. — Ә былтыр “Рес­пуб­ликаның иң яҡшы мәҙә­ниәт йорто” исемен яулау – беҙҙең өсөн иҫ киткес ҙур ғорурлыҡ һәм яуаплылыҡ та!
– 100 меңлек грант алған­һы­ғыҙ тип ишеттек. Ул хәт­лем аҡсаны нимәгә то­­тон­- доғоҙ һуң?
– Тауыш көсәйткес, компьютер, яҡтылыҡ музыка­һына... Шөкөр, күптәнге хы­я­лыбыҙ тормошҡа ашты.
– Костюмдарығыҙ ҙа зауыҡ­лы...
– Ҡаңны-Төркәйҙең 550 йыл­лығын үткәргән осорҙа ауылыбыҙ танымаҫлыҡ бу­лып үҙгәрҙе, яңы социаль объекттар барлыҡҡа килде, юлдар һалынды. Милли кос­тюмдарыбыҙ ҙа — ошо та­рихи көндәрҙең матур иҫтә­леге, — ти ирле-ҡатын­лы Кәримовтар.
Мәҙәниәт йылы сағыу байрамдары, күңелле тамашалары, иҫтә ҡалырлыҡ осрашыуҙары һәм яңы идеялары менән йәшәүен дауам итә. Хәйер, яҡташтарының рухи донъяһын байытыу, һәләттәрен үҫтереү, уларҙы сәхнә “йондоҙҙары” итеп күрергә теләгән Кәримовтар өсөн һәр йыл Мәҙәниәт йылы ул.