...Әмиров исемендәге хужалыҡтың Артауыл бригадаһы комбайндарын бер яландан икенсеһенә күсенеп, бойҙайҙы туранан-тура урып һуға башлағанда тап иттек. “Кәпербаш” тип аталған баҫыуға тәүгеләрҙән килеп еткәндәре һуҡҡан ашлыҡ менән тулы машина ырҙын табағына юлланғайны инде. Ул арала икенсеһе лә күренде.
– Юнир Исмәғилев булам, – тип таныштырҙы үҙен шофер егет. – Төп эшем еңел машинала, урып йыйыу башланғас, “ЗиЛ”-ға ултырҙым.
Комбайнсы Әҙис Саҙрисламов “баҫыу карабы”н үҙбушатҡыс кузовына яҡынлатып ҡуйҙы ла беҙҙең янға ыңғайланы.
– Көндәр матур торғанда үҫтерел­гәнде тиҙерәк йыйып алырға тыры­шабыҙ, – тип һүҙгә ҡушылды ул. – Был майҙанда эштәрҙе бөгөн үк, ысыҡ төшкәнсе теүәлләргә ине иҫәп.
Комбайнсы ныҡ ашыҡһа ла, бригадир Рәйес Миңлеғолов уны бергәләп фотоға төшөргә күндерҙе.
– Был баҫыу 145 гектарлыҡ. Бойҙай уңышы былай ярайһы ғына, йылына ҡарап, төшөм насар булмаҫ, гектарынан 15 центнер сығыр, – тип һөйләп алды Рәйес Нәзим улы икенсе комбайнды көткән арала. – Меха­ни­за­торҙарға һүҙ тейҙерерлек түгел. Барыһы ла дәртләнеп эшләй.
Етәкселек үҙ сиратында уларға тейешле шарттар булдырған. Көнөнә ике тапҡыр бушлай туҡланыу ойошторол­ған. Ашнаҡсылар Нурия Ғәббәзова менән Мәрзиә Маккулова хужалыҡ үҙәге Аҡсәйеттәге ашханала бешергән аш-һыуҙы Ринат Мөхәмәтйәров яландағыларға ваҡытында килтереп еткерә. Хәстәрлек булғанға игенсе­ләрҙең дә күңеле көр.
Быны алдынғы комбайнсы Алик Яппаров та ҡеүәтләне. Ул 5000 центнер иген һуҡҡан икән.
– Ун етенсе көҙҙө баҫыуҙа ҡаршылайым, – тине ул. – Механизатор танытмаһын мәктәптә саҡта уҡ алғайным, IX класта уҡығанда комбайнсы ярҙамсыһы булдым, һуңынан үҙаллы эш башланым. Ҡыштарын “Беларус”кә ултырам. Кәйефтәр яҡшы, барыбыҙ ҙа тырышабыҙ.
Ул арала бункер бушаны. Алик беҙҙең менән хушлашты ла комбайнын алға йүнәлтте. Уның моторының тауышы яланда иген һуҡҡан башҡа “баҫыу караптары” моңона өҫтәлде. Был үҙенсәлекле йыр, арыу-талыуҙы белмәгән эшсәндәрҙе емешле хеҙ­мәткә әйҙәп, Әри йылғаһы буйындағы туғайға таралды.