Уларҙың тәүгеһе – янғын һүндереү автомобиле. Был махсус техника “КамАЗ-43502” шассийы базаһында йыйыла һәм “Евро-4” талаптарын тулыһынса ҡәнәғәтләндергән двигатель менән йыһазландырыла. Бел­гестәр билдәләүенсә, автомобилдә Европаның алдынғы машина эшләү­селәренең заманса ҡорамал­дары ҡул­ланыла. Үҙенең техник яҡтан тәьмин ителеше, уңайлылығы һәм биҙәлеше яғынан ул иң юғары талаптарға яуап бирә. Ҡыҫҡаһы, “премиум” класлы техника рәтенә баҫырға ныҡлы дәғүә итә.
Махсус машина ут сыҡҡан урынға ете кешенән торған янғын һүн­дереү­селәр төркөмөн алып барыу өсөн тәғә­йенләнгән. Ул ҡала һәм ауылдарҙағы торлаҡ йорттарҙа, төрлө сәнәғәт объекттарында һәм урман­дарҙа утты тиҙ арала һүндереү ҡорамалдары менән йыһазлан­ды­рылған. 3000 литр һыйҙы­рышлы цистернаһы шундай уҡ һауыт­тан, һыу үткәргес селтә­ре гидрантынан йә асыҡ һыу ятҡылығынан тулыландырыла. Кәрәк бул­ған­да 200 литрлы бак­тағы күбекте ҡулла­нырға ла була.
Автомобилдең “КамАЗ” шассийы база­һында йыйылыуы уның юлһыҙ ерҙән дә, тротуар бордюры аша ла сыға алыу мөм­кинлеген бирһә, цистерна менән янғын һүндереү ҡорамал­дарының дөрөҫ һәм уңайлы урынлаштырылыуы уның төр­лө шарттарҙа ла тотороҡло хәрәкәт итеүенә булышлыҡ итә.
Электроника ярҙамында идара ителгән сит ил гидравлик ҡорамал­дарын ҡуйыу янғын һүндереү маши­наһының ышаныслы эшләүен тәьмин итә. Әлегә беҙҙең илдә уларҙы алмаш­тырырлыҡ механизмдар етеш­терел­мәй. Һыу насосы ла 10 йылға тиклем уңышлы хеҙмәт итәсәк тип күҙаллана. Нефтекамала сығарылған яңы янғын һүндереү машинаһын “ҡыҙыл әтәс”кә ҡаршы һынап ҡара­ғандар уның тура­һында тик маҡтау һүҙҙәре генә әйтә.
Коллективтың икенсе ҡаҙанышы – «НефАЗ-52992» маркалы электр автобусы. Уның һынау сифатында йы­йылғаны май айынан бирле Но­во­сибирск ҡалаһындағы химия кон­центра­ты заводында 10 мең саҡрым йөрөгән дә инде. Күп ҡалаларҙа үҙен тик яҡшы яҡтан күрһәтеп өлгөргән тәпәш иҙәнле автобус базаһында эшләнгән был электробус 110 кеше һыйҙырышлы. Ул, предприятие хеҙ­мәт­кәрҙәрен ҡаланан эшкә алып килеп һәм ҡайтарып ҡуйып, көнөнә ете рейс яһай. 90 саҡрымдан артығыраҡ юл үтә. Заманса машинаны ике тәүлеккә бер тапҡыр энергия менән зарядларға кә­рәк. 500 киловатт ҡеүәте булған зарядлау станцияһын ҡуллан­ған осраҡта электробустың аккумулятор батарея­һын ни бары 30 минут эсендә сафҡа индерергә була. Бындай мөмкинлек булмағанда, электр авто­бусының бор­тындағы зарядлау ҡорол­маһы быны һигеҙ сәғәттә башҡара.
Аккумуляторының тулы заряды ме­нән 250 саҡрымдан күберәк ара үтә алған был электробус – Рәсәй тарихында ошондай тәүге транспорт сара­һы. Был ҡаҙаныш махсус сертификат менән нығытылған. Электр автобусы фәнни-тикшеренеү институты ғалим­дары менән берлектә “НефАЗ”-дың үҙ белгестәре һәм эшселәре тарафынан сафҡа индерелгән.
Ҡәҙимге автобустарға ҡарағанда, электробусты ҡулланыу күпкә осһо­ҙораҡ икәнен Новосибирск заводында шунда уҡ иҫәпләп сығарғандар. Быны дәлилләү өсөн бер миҫал етә: яңы төр машинаны зарядлау 600 һумға төшһә, беҙ күнеккән автобустарға ошо уҡ араны үтер өсөн кәрәк булған яғыулыҡ хаҡы дүрт тапҡырға артығыраҡ.