З. СӘҒИТОВА.
Ҡыйғы районы.

– Бисмилләһир-рахмәнир-рахим!
Иң тәүҙә шуны әйтеп уҙыу зарур: һуңғы йылдарҙа Аллаһ Тәғәләнең ризалығына өмөт итеп ҡорбан сал­дыр­ғандар бермә-бер күбәйҙе, әл-хәмдү лил-ләһ. Был, әлбиттә, йәм­ғиәте­беҙҙең дингә яҡынайыуы, әҙәм балаһы күңелендә юғары көскә ыша­ныстың, күркәм сифаттарҙың өҫтөнлөк ала барыуы хаҡында һөйләй.
Раббыбыҙ беҙгә төрлө ғибәҙәтте фарыз ҡылған, уларҙың һәр береһенең айырым хикмәте бар. Шул иҫәптән ҡорбан са­лыуҙың да. Хаҡ Тәғәләнең барлығына һәм берлегенә инаныуҙы, йомартлыҡты сағыл­дырған был ғәмәлде башҡарған кеше Аллаһ алдында ҙур сауапҡа өлгәшә. Бы­нан алдағы яҙмаларымда әйтеп үткә­немсә, ҡорбанлыҡтың ите өс өлөшкә бү­ленә. Тәүгеһе ғаилә менән бергәләп ризыҡланыу өсөн булһа, икенсеһе Ҡөрьән мәжлесен үткәреүгә тәғәйенләнә, өсөнсөһө иһә фәҡирҙәргә бүлеп бирелә. Пәйғәм­бәребеҙ Мөхәммәт ғәләйһис-сәләмдең ҡорбан салыу хаҡында бихисап хәҙисе бар. Уларҙы уҡыу, өйрәнеү, белмәгәндәргә еткереү дөйөм үҫешкә ҙур бәрәкәт бирер.
Иншаллаһ, тиҙҙән Ҡорбан ғәйете етә. Был изге көндәрҙә мосолмандар, туған­дарын, яҡындарын йыйып, матур мәжлес үткәрергә тырыша, бүләктәр бирешә, ҡорбанлыҡ ҡабул булһын тип доға ҡыл­дыра. Миңә мөрәжәғәт иткән ҡәрҙә­шебеҙҙең һорауына килгәндә иһә, Ислам бер мәжлесте ике уңайҙан уҙғарыуға ҡаршы килмәй. Ләкин шул ҡағиҙәне үтәү мөһим: сараның әүәлендә Ҡөрьән уҡылып, сәләмәтлек, именлек, татыулыҡ, бәрәкәт өсөн доға ҡылдырылһа, итте ашағас, йәғни ахырҙа башҡа изге ниәткә (мәҫәлән, сабыйға исем ҡушыу, мәрхүмдәрҙе иҫкә алыу) аят сығыла. Һөҙөмтәлә ике мәж­лесте бергә йыйыу кеүек килеп сыға.
Ғөмүмән, хөрмәтле ҡәрҙәштәр, ҡорбан салыуҙың, ошо уңайҙан Ҡөрьән уҡытыу­ҙың ошо ғәмәлдәрҙе ҡылған ғаилә өсөн бәрәкәте иҫәпһеҙ-хисапһыҙ. Тимәк, уны бер генә ваҡиғаға бағышлап үткәреү ҙә мөмкин түгел: барыһын да үҙ эсенә ала. Беренсенән, яҡын кешеләр менән осра­шабыҙ. Был уңайҙан Пәйғәмбәребеҙ үҙе­нең мөбәрәк хәҙисендә: “Туғандар илә күрешеү ғүмергә ҙур бәрәкәт бирә”, – тигән. Икенсенән, йортобоҙға Ҡөрьән инә, уны нурға күмә. Өсөнсөнән, был мәжлес йомарт булыу зарурлығын аңғарта. Өҫтәүенә Ҡөрьән күңелебеҙгә инә, балаларыбыҙ, туғандарыбыҙ дингә яҡынлай, доға мәр­хүмдәрҙең рухын яҡтырта... Әйткәнемсә, изге ниәттә ҡылынған ғәмәлдең бәрәкәте икһеҙ-сикһеҙ.
Аллаһ Тәғәлә һәммәбеҙҙең дә ҡорбан­лыҡтарын ҡабул итһен, Ҡөрьән мәжлес­тәрен үткәреп торорға, уның бәрәкәтендә имен, татыу, мул йәшәргә насип ҡылһын, иншаллаһ. Әс-сәләмү-ғәләйкүм үә рәхмә­тул-лаһи үә бәрәкәтүһ! Амин.