Өфө районының Зубов ауылындағы Тә­лиғә менән Марат Кирәевтәрҙең татыу йә­шәүенә тиҙҙән 50 йыл тула. Ошо ваҡыт эсендә ниҙәр генә кисермәгәндәр! Ғүмере­нең күп өлөшөн Баймаҡ районындағы “Ирәндек” колхозында намыҫлы эшләгән Марат Сөләймән улы хәҙер һигеҙенсе тиҫ­тәне ҡыуа. Саҡмағош районында тыуған егет Баймаҡ яғына йүнәлтмә буйынса ебәрелгән булған. Пермь ауыл хужалығы институтын тамамлағас, егет баш иҡтисадсынан хужа­лыҡ етәксеһенә тиклемге баҫҡыстарҙы үт­кән. Райондың “Ирәндек”, “Баймаҡ” сов­хоз­дарын­да директор, Өфөләге “Агропромхимия” ойош­ма­һында идарасы кеүек ва­зи­фаларҙы атҡар­ғанда ҡатыны Тәлиғә ныҡлы терәк була.
Ҡазан педагогия институтының физика һәм математика факультетын тамамлаған ҡатын “Мир” фирмаһында мастер, Баймаҡ районының Төрөкмән, Аҡморон, Өфө ра­йоны­ның Чесноковка ауылдарындағы мәктәп­тәр­ҙә балаларға математика серҙәрен өй­рәткән.
Хеҙмәт һәм кеше экологияһы институтында эшләгән ҡыҙҙары Лилиә, Өфө дәүләт авиация техник университеты доценты, техник фәндәр кандидаты Радик, “Металл конструкциялар” йәмғиәте етәксеһе Эльвира өсөн ата-әсәһе – тырыш хеҙмәт, бәхетле йәшәү өлгөһө. Улар ҙа бына тигән матур ғаилә ҡорған, балалар үҫтерә.
“Почет Билдәһе” ордены кавалеры, хеҙ­мәт ветераны Марат Кирәевте, уның ҡа­тыны, халыҡ мәғарифы алдынғыһы Тәлиғә Хөснөриал ҡыҙын баймаҡтар әле һаман онотмай, төрлө сараларға саҡыра. Изгелек ерҙә ятып ҡалмай шул.