Хәтерегеҙҙәлер, ул йылды йәй ысынлап та бик эҫе килде. Һауа температураһы — 30, ваҡыты менән хатта 40 градусҡа етте. Етмәһә, баҡ­самдағы торбаларҙа ла, ҡойола ла һыу бөттө. Күршеләремдең күбеһе баҡсаларына бөтөнләй йөрөмәй башланы хатта. Байтағының алмағас­тары ҡороно. Ә мин баҡсамды, бигерәк тә алмағастарымды яратҡанға күрә, ике саҡрым алыҫлыҡтан бәләкәй генә йылғасыҡтан биҙрәләр менән һыу ташып, уларҙы һаҡлап алып ҡалдым.
Синоптиктар киләһе ике-өс көнгә һауа торошон дөрөҫ фаразлаһа ла, ике-өс айға алдан күҙаллай алмай. Шуны хәтер һандығына һалып ҡуйһаҡ ине. Быйыл ҡыҫҡа ғына йәйебеҙҙең иң эҫе айында ла өшөп йөрөнөк бит. Етмәһә, туҡта­май ямғыр яуҙы. Балаҡатай, Силәбе өлкәһенең Нязепетровск райондарында йәшәгән туғанда­рым июль башында бесән әҙерләргә төшкәйне, бер туҡтауһыҙ яуған ямғыр уны серетеп бөтөрҙө. Август башында ла бесән эшләп бөтә алмай яфаланалар ине әле. “Был үләнде йыйып тораһы юҡ инде, уны мал барыбер ашамаясаҡ, икенсе ерҙән сабырға тура килер”, — тип ҡайғыға ҡалды улар. Бына бит, һауа торошона бәйле мәғлүмәттәрҙең алдан дөрөҫ әйтелмәүе ниндәй хәлгә ҡалдыра.
Әле яңыраҡ ҡына Краснокама, Яңауыл, Ҡал­тасы яҡтарында көслө ғәрәсәт үтте. Шуны синоп­тиктарыбыҙ алдан күрмәнеме икән ни? Ә бит ундай бәлә-ҡаза һуңғы ваҡытта Башҡорт­останда йышайҙы. Йомортҡа ҙурлыҡ боҙ-борсаҡ яуһын­мы, көслө ел-дауыл ағастарҙы тамырынан аҡта­рып, ҡыйыҡтарҙы алып китһенме, йәй уртаһында ҡар төшһөнмө...
Көн дә иртән йәки кис һауа торошон тыңлай­быҙ, тимәк, ышанабыҙ. Ә ышанысты аҡларға кәрәк, минеңсә.