3-сө төҙөлөш фирмаһы Туймазы төбәген төҙөкләндереүгә көсөн йәлләмәй. Йәй уртаһында ғына 48 һәм 30 фатирлы ике йорт файҙаланыуға тапшырылған. Бында башлыса авария хәлендәге торлаҡтан күскәндәр. Ҡаршыбыҙға сыҡҡан Гүзәл апай Исламғолова ейәнсәре менән яңы балалар майҙансығына юлланғайны.
– Элекке йортобоҙ авария хәлендә булһа ла, ҡулдан килгәнсә тырышып, төҙөк­лән­дереп йәшәнек. Әммә беҙҙең аҫтағы фатирҙа янғын сыҡты. Төтөн, ҡором йортто ҡарағыһыҙ итте. Артабан унда йәшәргә теләк тә юҡ ине. Тап шул осорҙа ошо фатирға күстек. Әлбиттә, шатбыҙ! Бүлмәләр йылы, яҡты, иркен. Ҡыуанысыбыҙ сикһеҙ. Бына ейәнсәрем дә, балалар баҡсаһына бармайым, өләсәй менән яңы өйҙә ултырам, тип ашҡынып тора, – тип һөйләне ул.
Туймазыға юлланы­уы­быҙ­ҙың төп сәбәбе 12 фатирлы өс ҡатлы йортто асыу тантанаһында ҡатнашыу ине. Барып етеүебеҙгә ха­лыҡ йыйылған, шау-гөр ки­леп балалар уйнай. Туй­- мазыларҙы Башҡор­тостан­дың Төҙөлөш һәм архитектура буйынса дәүләт ко­ми­теты рәйесе урын­ба­ҫары Хәлит Мәхмүтов тәүгеләрҙән булып ҡотланы:
– Торлаҡ-төҙөлөш кооперативтары ярҙамында йорт һалыу программаһы былтыр тергеҙелде. Федераль ки­мәлдә закондар ҡабул ителгәс, Туймазы һәм Нефтекама ҡалаларында тәүге йорттарға нигеҙ һалынды ла инде. Тап ошо төбәк­тәрҙең һайланыуы юҡҡа түгел, бында хакимиәттәр торлаҡ төҙөүгә ҙур иғтибар бүлә. Беҙҙең өмөт аҡланды. 3-сө төҙөлөш фирмаһы тиҙ арала йортто сафҡа ин­дерҙе. Өй алдын төҙөк­лән­дереүгә лә иғтибар бү­лен- ­гән: заманса йыһаз­лан­ды­рылған балалар май­ҙан­сығы, туҡталҡа бар. Туй­мазыла ғына түгел, республикала ла һеҙҙең тәжри­бәгә таянып төҙөлгән йорт­тар артҡандан-артыр. Бөгөн төбәктә 90 мең ғаилә торлаҡ шарттарын яҡшыр­тыу­ға мохтаж. Әлеге программа иһә бюджет өл­- ­кә­­һендә эшләгәндәргә тә­ғә­йенләнгән. Ул торлаҡты баҙар хаҡынан 20 процентҡа осһоҙораҡҡа һатып алыу мөмкинлеген бирә.
Фатир асҡыстарын тапшырғанда Туймазы районы хакимиәте башлығы Айҙар Суфийәнов әлеге тәжрибәнең бик уңышлы булыуын йәнә бер тапҡыр һыҙыҡ өҫтөнә алды. Йәмғиәт етәксеһе Илфир Миңлебаев ҡунаҡтарға фатирҙарҙы күрһәтте. Йорт хужалары ла, етәкселәр ҙә төҙөлөштөң сифатынан ҡәнәғәт ҡалды.
Артабан ошо көндәрҙә сафҡа ингән йәнә бер объектҡа юлландыҡ – район­дың Әгертамаҡ ауылында ҙур сауҙа үҙәге асылды. Биләмәнең йылдан-йыл үҫеүенә 3-сө төҙөлөш тресы ҙур өлөш индергән. Бынан бер нисә йыл элек 180 йортлоҡ яңы урамға нигеҙ һалынған. Шунда уҡ “Теремок” исемле балалар баҡсаһы ҡалҡып сыҡҡан. Йәштәр бында гөрләтеп донъя көтә. Декрет ялында ултырған әсәйҙәр, бала-саға күп. Әммә бөгөнгә тиклем яңы урамда магазин бул­маған. Был хәл халыҡҡа уңайһыҙлыҡ тыуҙырған. Ошоно иҫәпкә алып, йәмғиәт ике ҡатлы сауҙа үҙәге һа­лырға хәл итә. Бында магазин, почта, дарыухана, бөҙрәхана, балалар өсөн ял бүлмәһе һәм кафе бар. Йүнселдәр ең һыҙғанып эш башлаған да инде.