Әйткәндәй, Башҡортостан­дың ха­лыҡ рәссамы, рес­публикабыҙҙың Салауат Юла­ев исемендәге дәүләт пре­мияһы лауреаты Рәмил Килмә­мәтов яратҡан шөғөлөнә 35 йылдан ашыу ғүмерен бағышлаған. Ошо дәүер эсендә ул ер-һыуыбыҙҙы ар­ҡыры­һынан буйына йөрөп сыҡҡан, бынан тыш, бик күп илдәрҙе лә гиҙ­гән. Фотоһүрәт­тәре Мәс­кәүҙә, Санкт-Петербургта, Ас­та­нала, Баҡыла, Мин­с­киҙа, Истанбулда, Анкарала, Ҡаһи­рәлә, Римда, Парижда, Дрезденда, Берлинда һәм башҡа төбәк­тәрҙә шәхси күргәҙмәлә­ренә ҡуйыла.
Ошо көндәрҙә арҙаҡлы за­ман­да­шы­быҙ, Башҡорт­остан­дың һәм Рә­сәй­ҙең атҡаҙанған мәҙәниәт хеҙ­мәткәре Рәмил Килмәмәтов 65 йәшлек юбилейын билдәләне. Шул уңайҙан рес­публикабыҙҙың Милли музейында уның “Йылдар, аралар аша” тигән фото­күргәҙмәһе асыл­ды. Иҫтәлекле ваҡиға уңайынан ижадсыны Баш­ҡорт­остандың мәҙә­ниәт министры урынбаҫары Ранис Ал­тын­баев, Республика халыҡ ижа­ды үҙәге директоры Байрас Ишбир­ҙин, шулай уҡ дуҫтары, хеҙ­мәт­тәштәре, Салауат, Благовар, Ҡыйғы, Дыуан район ха­кимиәттәре вәкилдәре ҡотланы.
Рәсәй фотосәнғәтен үҫтереүгә тос өлөш индергән шә­хестең был күргәҙ­мәһендә «Башҡорт аттары тура­һын­да йыр», «Һабантуй», «Миңә яҡын Ер», «Еңеү һалдаттары», «Көньяҡ Урал», «Йолаларҙы һаҡлаған ер», «Дуҫымдың күҙҙәре күргән Иран» кеүек төрлө тематик циклдарҙан торған ижади эштәре урын алған.
Республикабыҙҙың үҫешенә күп көс һалған кеше­ләрҙең фотопортреттары күргәҙмәлә айырыуса иғтибар­ҙы йәлеп итә: ихлас йылмайған Социалистик Хеҙмәт Геройы Шәүәли Вахитов, халыҡ шағирҙары – яҡ­таштары араһында Назар Нәжми, ҡулын йөрәгенә ҡуйған Рауил Бикбаев, алыҫтарға ҡараш ташлаған академик Әхмәт Сөләймәнов, тәрән уйҙарға сумған режиссер Олег Ханов, ҡатмарлы операциянан һуң бер аҙ хәл алырға ултырған офтальмолог Эрнст Мулдашев...
Рәмил Килмәмәтовтың осҡор ҡа­рашы Башҡортостан менән генә сик­ләнмәй, Рәсәй киңлектәрен дә айҡай: башҡорт милли кейемендә сәхнәлә баҫып торған Юрий Лужков, трибунанан ялҡынлы сығыш яһаған Михаил Горбачев, Өфө халҡы менән осра­шыуға килгән Владимир Путин...
— Мин өлкән быуын кешеләрен яратам, – ти Рәмил Исмә­ғил улы, – улар ауыр­лыҡтар аша үткән, һу­ғышты ла, аслыҡты ла, һыуыҡты ла кисергән. Был быуын тура­һын­да күберәк һөйләргә те­ләйем. Әгәр бөгөн ошоно эшләп өлгөрмәһәк, һуң була­саҡ. Республика тарихы өсөн уларҙы һаҡлап ҡалдырғы ки­лә. Оло кешеләр бөгөн дә бик матур, уларҙың һәр йы­йыр­сығында заман эҙе һаҡлана.
– Ошонда булған фото­һү­рәт­тәрҙе ҡарап ҡына ла, Баш­ҡортостандың тарихын өйрәнергә була, – тигәйне күргәҙмә менән танышырға килгән­дәрҙең береһе. Ижадсы Рәмил Кил­мә­мәтов өсөн шунан да юғарыраҡ баһа юҡтыр.