Ҡапыл ғына директор урынбаҫары урыны бушағас, бүлек начальнигы Мөнирә Сәғитйән ҡыҙының ҡыуанысының сиге булма­ны. Был вазифаның мәшәҡәте күп, әммә мәртәбәһе лә ҙур. Айырыуса хеҙмәт хаҡы елле генә. Ә бөгөнгө заманда һимеҙ ҡалъя ымһындыра шул.
Ойошмала унан баш­ҡа урынбаҫар булырлыҡ ке­ше юҡ шикелле. Мөнирә Сә­ғит­йән ҡыҙы уйынан ғына бүлегендәге хеҙ­мәт­кәр­ҙәрҙе барлап сыҡ­ты. Тәж­рибәһеҙ егет Айратты иҫәпкә алмағанда, гел йы­йын ҡа­тын-ҡыҙ. Бисә-сәсәне ене һөймәй: ай һайын яңы кейем һатып алып, сәс-мәсен модалы итеп киҫтереп, гөлдәй балҡып йөрөйҙәр. Нисек аҡса еткерәләрҙер суҡынсыҡтар, бына уның хеҙмәт хаҡы ашау-эсеүҙән артмай. Шул ҡул аҫтындағыларға ҡа­рап, һаулығы ҡаҡшаны хат­та. Табипҡа барғайны, уныһы психолог сүрәтенә кереп: “Һеҙгә лә прическа яһатып, аҡтан-аҡ кейенеп йөрөргә кәрәк. Төҫтәр терапияһы ярҙам итер”, – тине. Күңелде ҡорт кимер­гәндә сағыу кейем дә ҡыуаныс килтермәй икән ул. Йәмрәйгән йөҙ менән аҡ костюмда ултырыу бигерәк көлкө күренә – бер-ике көндән сисеп ырғытты уны.
Ә уны урынбаҫар итеп алғас, бүлекте кем етәкләр һуң? Йәнен көйҙөргән теге ҡыҙ-ҡырҡындың береһе­ме? Юҡ инде, булмаҫ, юл ҡуймаҫ быға! Ҡатындың уйы әлеге лә баяғы берҙән-бер егет йораты­на барып тоташты: “Айратты тәҡдим иткәндә? Йәш бул­һа ни, әҙерләр, ярҙам итер, теләк­тәш­лек күрһәтер. Бары анау ҡатын-ҡыҙ­ға аяҡ салырға!” Ләкин ху­жа мәсьә­ләне һаман күтәрмәгәс, был турала асыҡ­тан-асыҡ әйтергә ҡый­ма­ны. Шулай ҙа нигеҙ әҙерләй торорға кә­рәк. Мәҫәлән, “һәләтле, тырыш егет, мот­лаҡ үҫтерергә ине”, тип маҡтаһа ин­де. Башҡарған эштәрен хуплап тороп, яр­ҙам да итеп ебәрһә тағы. Бер аҙҙан директор ҙа үҙенән-үҙе Айрат бүлек начальнигы булырлыҡ тигән фекергә килер, моғайын.
Мөнирә Сәғит­йән ҡыҙы был бурысҡа етди ҡара­ны. Айраттың бәләкәй генә уңышын ҡабартып, төймәләй эшен дөйәләй итеп күрһәтте, башҡаларҙыҡын хурланы. Уға йөкмәтелгән­де шым ғына үҙе башҡарып ултыр­ҙы. Шулай бер нисә ай дауам итте. Егет иһә бөтөнләй ролгә инеп китте. Фырт ҡына эш күрһәткән булып ҡыланды, алдынан алғанды оҫта файҙаланды.
Бер көн килеп тырышлыҡ емешен бир­ҙе. Директор хеҙмәткәрҙәрҙе йы­йып ал­ды. Мөнирә Сәғитйән ҡыҙы тантанаға йы­йынған кеүек хис итте үҙен. Бына-бына үрләйәсәк ул! Директор ҙа уға һынамсыл ҡарап ҡуйҙы түгелме?
Бөтәһен дә күҙҙән үткәргәс, хужа һүҙ башланы:
– Хөрмәтле хеҙмәттәштәр! Күптән инде урын­баҫар урынына кеше кәрәк. Күҙәтеп йөрөп, оҙаҡ уйланғандан һуң, был вазифаға... Айрат Килде­ғошов­ты тәғәйенләйем. Бик лайыҡлы кандидатура, эйеме, Мөнирә Сәғитйәновна?
Үҙен урынбаҫар итеп күргән бүлек начальнигы, ҡаҙаҡланғандай, урынында ҡатты ла ҡалды. Һемәйттеләр түгелме һуң? Бына һиңә теләктәшлек күрһәтеү!