Тау башынан (уның бейеклеге 500 метрҙан ашыу) бөтә тирә-яҡ ус төбөн­дәгеләй күренә. Су­саҡтау осло түбә­һенә күтәрелгән һәр кемде иҫ киткес гүзәл­леге менән таң ҡалдыра. Тыуған яҡты өйрәнеү, тарих һәм археология менән мауыҡҡан кешеләр араһында был урын ҙур ҡыҙыҡһыныу, бәхәс, фараздар ҙа тыуҙыра. Ә яҡын-тирәләге ауылдарҙа йә­шә­гәндәр тауҙың мөғ­жизәле кө­сөнә ыша­на. Күп­тәр өсөн ул – барлыҡ теләктәр ҡабул булған из­ге ер, шуға күрә лә ҡайһы бе­рәү­ҙәр уны Теләктәр тауы тип йөрөтә. Борон заман­дарҙа Су­саҡтауҙа баш­ҡорт­тар йыйын йыйған, сәсән­дәр, ырыу аҡһаҡал­да­ры май­ҙан тотҡан, тап ошонда мөһим ҡа­рарҙар ҡабул ител­гән.
Хәҙер элекке матур йолалар тергеҙелә. Осло тау башынан йылдың теләһә ниндәй миҙгелендә лә кеше өҙөлмәй. Берәүҙәр – көс, икенселәр илһам алырға, өсөнсөләр Дим буйының гү­зәллегенә һоҡланырға, иҫ киткес матур тәбиғәт күренештәрен һүрәткә һәм фотоға төшөрөргә килә унда.
– 21 июндән 22-һенә ҡараған, йәғни йылдың иң ҡыҫҡа төнөндә, Ер шары буйлап йөҙҙәрсә мең кеше изге урындарға ашыға, – ти яҡта­шыбыҙ Миңзәлә Фазлетдинова. (Әйткәндәй, Миңзәлә Вәлиулла ҡыҙы – хажиә, ул Сурай ауылында тыуып үҫкән, ире Ҡәдүрий хажи әфәнде менән хәйриә эше алып баралар, мәсеттәр төҙөргә ярҙам итәләр, шул иҫәптән тыуған ауылдарында ла улар ярҙамында иман йорто һалынды). – Миңә лә бер нисә тапҡыр йәй көнө Арҡайымда, Һиндостанда, Ғәрәфәт, Торатау һәм Ирәмәл тауҙарында таң ҡаршыларға тура килде. Үҙебеҙҙә лә изге урындар бар­лығы һөйөндәрә. Хәҙерге заманда кешеләр­гә иман кәрәк. Ана бит Украинала ниндәй сыуалыштар ба­ра... Хоҙай шундай ҡай­ғы-хәсрәт күрһәт­мә­һен! Үҙе­беҙ­ҙең тә­биғәт ба­лаһы икән­лекте онот­маҫҡа, ҡул­­дары­быҙ­ҙы күккә, ҡояшҡа һоноп, тыуған ере­беҙгә рәхмәт әй­тергә, ты­ныслыҡ, һаулыҡ һәм изге ғә­мәлдәр теләргә кәрәк.
Абруйлы яҡташыбыҙҙың һүҙ­ҙәрен Ҡыпсаҡ-Асҡар ауы­лы йәштәре күтәреп алды. Ҡояш сығыуын Сусаҡтау башында ҡаршы алды улар, ә Сурай ауылының “Ағинәй” мәсете имам-хатибы Жәүит Ризуанов аҙан әйтте. Моңло аҙан тауышы иртәнге ысыҡ тамсылары менән бергә тирә-яҡҡа һибелде. Ошо ғәжәйеп иртәлә тауҙарға күтәрелгәндәр теүәл бер йылдан һуң Сусаҡтау башында тағы ла осрашырға һүҙ ҡуйышты.
Теләктәр ҡабул булһын!