Был хәл “Башкирэнерго” етәкселе­генең ҡотон ала. Мәскәүҙән өҙөклөктө ете көн эсендә бөтөрөүҙе талап итәләр. Поездар йөрөшөн тотҡарлаған өсөн ҙур штраф менән ҡурҡыталар, төрмә менән янайҙар. Егерме километр араға ете көндә бағаналар ултыртып сығыу мөмкин түгел, кәмендә бер ай кәрәк буласаҡ, ти белгестәр.
“Башкирэнерго” етәкселегенең тамам башы ҡата. Шул саҡ электромонтерҙар бри­гадаһының мастеры Фахразый Таһировты иҫтәренә төшөрәләр. Булдыҡлы, аҡыллы егеттең йыш ҡына ауыр хәлдән ҡотҡарғаны була. Эшселәр өсөн тейешле шарттар тыуҙырғанда, был яуаплы бурысты атҡарып сығырға була, тип белдерә ул. Әлбиттә, эш еңелдән түгел. Шулай ҙа Фахразый Әхмәҙиә улы етәкселегендәге бригада, туң ерҙе заманса алымдар ҡулланып ҡаҙып, етенсе көндә эште теүәлләй.
Был – Башҡортостандың атҡаҙанған энергетигы, Өфө ҡалаһының почетлы гражданы, Социалистик Хеҙмәт Геройы Фахразый Әхмәҙиә улының оҙайлы, намыҫлы хеҙмәт юлының бер өлөшө генә. Яҡташтары янына, Үзбәк мәктәбенә осрашыуға килгәс, уҡыу­сылар ҙа, өлкәндәр ҙә уның тыныс тормош­тағы батырлығы хаҡында китаптан уҡып бел­гәнен йәнә күңеленән үткәрҙе.
Белем усағы директоры Айгөл Ғәбдиева һүҙҙе Фахразый Әхмәҙиә улына биргәс, зал йәнләнеп китте. Балалар ғына түгел, өлкән­дәрҙең йөҙөндә лә ҡыҙыҡһыныу уянды. Бы­на ниндәй мәшһүр яҡташтары бар уларҙың! Күкрәгендә Ленин, Хеҙмәт Ҡыҙыл Байраҡ ордендары балҡыған уҙаман үҙенең хеҙмәт юлы хаҡында бер нисә һүҙ менән генә әйткәндән һуң:
— Һеҙ, моғайын, минең турала яҙыусы Лира Яҡшыбаеваның “Вәрәҙекүл аҡсар­лағы” тигән китабы аша беләһегеҙҙер. Ә минең ауыл­дашыбыҙ Социалистик Хеҙмәт Геройы Миңлегөл Санъярова хаҡында һөйләгем килә, – тине.
Әйткәндәй, яҡташтары был повесты яратып уҡыған, мәктәптә өйрәнгән, фекер алыш­ҡан. Ә Наҙгөл Ғәбдиева башҡорт теле уҡы­тыусыһы Әлфиә Рафиҡова етәкселе­гендә ғилми эш яҙып, районда беренсе урынды яулаған.
— Миңлегөл Әгелмөхәмәт ҡыҙы ошо ауыл­да тыуған. Тәүҙә колхозда эшләй, аҙаҡ Өфөгә күсеп килгәс, ташсы һөнәрен үҙләш­терә. Ул күп кенә сәнәғәт һәм социаль объекттарҙы төҙөүҙә ҡатнашты, – тине Фах­ра­зый Әхмәҙиә улы. – 1975 йылда Өфө моторҙар етештереү заводында “Москвич-412” автомобиле двигателдәре эшләү өсөн яңы комплекс төҙөштө, Социалистик Хеҙмәт Геройы исеменә лайыҡ булып, “Ураҡ һәм Сүкеш” алтын миҙалы, Ленин ордены менән бүләкләнде. Уның Хеҙмәт Ҡыҙыл Байраҡ ордены ла бар ине. 2010 йылда мәрхүмә булды яҡташыбыҙ.
Осрашыуға китап авторының үҙе — Лира Яҡшыбаеваның килеүе кисәне йәмләп ебәрҙе.
— Фахразый Таһиров, Миңлегөл Санъярова кеүек шәхестәр — бөгөнгө заман геройҙары, улар кеүек эш һөйөп үҫегеҙ, яҡшы уҡығыҙ, – тине балаларға яҙыусы апайҙары.