Бөгөн Башҡортостандың ауыл хужалығында шәкәр сөгөл­дөрөн йыйыу өсөн тәғәйенләнгән 150-нән ашыу комбайн бар. Көндәр матур булһа, был техника яр­ҙамында бурысты ике ай эсендә атҡарырға мөмкин. Шулай итеп, һәр комбайнға уртаса 200 гек­тарҙан уңыш йыйырға тура килә­сәк. Ҡайһы бер райондарҙа, мәҫәлән, Баҡалыла был күрһәт­кес – 700, Дәүләкәндә 500 гектар.
Ҡырмыҫҡалы районында ла “татлы тамыр”ҙы йыйыуҙың ҡыҙ­ған мәле. Бөгөн “Артемида”, “Үҙәк” МТС-ы, “Башҡортостан” йәмғиәттәре, Шайморатов исе­мен­дәге хужалыҡ сөгөлдөр сы­ғарыу менән мәшғүл. 12 сен­тябрь мәғлүмәттәренә ҡарағанда, 335 гектар майҙандан 8 мең 375 тонна уңыш йыйып алынған, гектар ҡеүәте – 250 центнер.
“Үҙәк” МТС-ы филиалы эш­сәндәре ураҡҡа районда тәү­геләрҙән булып төштө. Хужалыҡ баҫыуҙарына барғас, рәт-рәт те­ҙелешеп ятҡан сөгөлдөр өйөм­дәренең ҡояш нурында бал­ҡып ятыуына шаһит булдыҡ. Ауыл кешеһенең йәй буйы тырышып үҫтергән хеҙмәт емеше алтынға бәрәбәр. Шуға күрә уны ваҡы­тында юғалтмай йыйып алыу өсөн бөтә көс һалына.
– Былтыр уңышты тапшы­рыу­ҙа проблемалар килеп сығыуы, һауа шарттарының тотороҡһоҙ­лоғо беҙгә ҙур һабаҡ булды. Шунлыҡтан быйыл шәкәр сө­гөлдөрөн йыйыуҙы иртәрәк баш­ланыҡ. Сеймалды Раевка шәкәр заводына тапшырабыҙ. Көнөнә яҡынса утыҙ-ҡырҡ рейс яһала. Уңыш гектарынан 250 центнер­ҙан кәм түгел, – ти хужалыҡ агрономы Фәнил Ғәлиев.
Шайморатов исемендәге ху­жа­лыҡта ла эш дәррәү бара.
– Әле 70 гектар ерҙән татлы аҙыҡ йыйып алынды. Уңыш был­тырғы­ ке­үек үк. Сөгөлдөр­сөләр Рәсих Низамов, Пантелей Неделков, Сер­гей Ангел һәм иҫәп­се Гөл­си­рә Иҫәнбаева бик тырыша, – ти йәмғиәт етәксеһе Ар­тур Нурғәлиев.
Ҡырмыҫҡалы эшсәндәре көҙг­ө эштәрҙә бар көсөн һала. Һауа шарттары ғына боҙол­ма­һын. Көндө төнгә ялғап эшләгән ауыл уңғандарының өмөттәре генә аҡланһын.