– Миңә ышаныс белдергән, беҙ алып барған сәйәсәтте хуплаған һәм киләһе биш йыл­лыҡта ла ошо йүнәлештә ҡа­лырға теләгән һайлаусы­ла­рыма рәхмәт. Иң мөһиме – һайлау­ҙар тыныс шарттарҙа лайыҡлы үтте, — тине Рөстәм Зәки улы.
Төбәк башлығы республика иҡтисадына байҡау яһап, ауыл хужалығына, торлаҡ төҙөүгә ­ мәсьәләләргә асыҡ­лыҡ индер­ҙе, финанс ресурс­тарға, санк­цияларға айырым туҡталды, ШОС, БРИКС саммиттарына әҙерлек барышы менән таныш­тырҙы, ғөмүмән, тармаҡ­тар­ҙы үҫтереүгә йүнәлтелгән пландар хаҡында һөйләне.
— Һайлау эшмәкәрлекте яңы­нан башлау тигәнде аңлат­май. Нисек эшләгәнбеҙ, артабан да ошо йүнәлештә дауам итәсәкбеҙ, — тине ул. — Һай­лау тәү сиратта — яуаплылыҡ. Еңеүемә ышандым. Шунһыҙ ярамай ҙа. Ләкин халыҡтың шул тиклем әүҙем ҡатнашыуын көт­мә­гәйнем. Бәл­ки, күрһәткес­тәр Рәсәй кимә­лендә әллә ни ҙур ҙа түгелдер, әммә беҙҙең осраҡта һәр тауыш мөһим.
Журналистарҙы һайлау­ҙарҙа иң юғары һөҙөмтәләр күрһәткән ауыл халҡының йәшә­йеше лә ҡыҙыҡһындырҙы.
— Ауылдар өсөн күңелем тыныс. Беҙҙә тырыш, егәрле халыҡ йәшәй. Ә ауыл хужа­лығын артабан үҫтереүгә кил­гәндә – ул төп маҡсат­та­рыбыҙ­ҙың береһе, – тине Рөстәм Зәки улы.
Осрашыу һуңында Рөстәм Хәмитов тағы бер тапҡыр һай­лаусыларына, уға таяныс, те­рәк булғандарға рәхмәт әйтте.
— Һайлауҙар үтте. Алда тағы ла яуаплыраҡ һынау көтә. Үҙемә ышаныс белдергән халҡым алдында һынау, — тине төбәк башлығы.