Ғөмүмән, Баймаҡта һуңғы йыл­дар­ҙа район хакимиәте, эшҡыуарҙар, ябай халыҡ ярҙамы менән иман йорттары күпләп төҙөлә, кешеләр яйлап булһа ла дингә ҡайта, йәштәрҙе ылыҡтыра. Йәрмөхәмәттә асылған мәсет – районда 58-сеһе.
Ауыл халҡын был тарихи ваҡиға менән ҡотларға Башҡортостан мосолмандарының Диниә назараты рәйесе мөфтөй Нурмөхәмәт хәҙрәт Ниғмәтуллин, район Советы секретары Радмир Ишбулатов, район ха­кимиәтенең эштәр идарасыһы Илгиз Байымов, имам-мөхтәсип Баймөхә­мәт хәҙрәт Ғиззәтуллин, ауыл билә­мәләре башлыҡтары һәм башҡа бихисап ҡунаҡ килгәйне. Алыҫ ара­ларҙы яҡынайтып, ситтә йәшәгән йәрмөхәмәттәр ҙә күпләп ҡайтҡайны.
Изге йортто төҙөү мәсьәләһен өс йыл элек Зөфәр Ишҡыуатов менән Ришат Ишембәтов халыҡ йыйылышында күтәреп сыға. Йәрмөхәмәттәр тәҡдимде хуплап ҡаршы ала. Күмәк көс менән күркәм иман йорто ҡалҡып сыға. Уға Ришат Вәкил улының әсәһенең – ошо ауылда йәшәп кит­кән, хәҙер баҡыйлыҡҡа күскән Асия Нурфәйез ҡыҙы Ишембә­тованың – исемен бирергә ҡарар итәләр.
Мәсетте асыу тантана­һында ауылдың тарихына, иман йортон төҙөү барышына байҡау яһалды, ихлас күңелдән тәбрикләү һүҙҙәре әйтелде. Ришат Ишембәтов объектты сафҡа индереүгә күп көс һалған етәкселәрҙе, эш­ҡыуар­ҙарҙы, айырым ке­шеләрҙе билдәләп үтте, уларға рәхмәт хаттарын тапшырҙы. Район Советы һәм хакимиәте вәкилдәре лә йәр­мөхәмәттәргә йылы тәбрикләү һүҙҙә­рен еткерҙе.
– Халҡыбыҙҙың уяна, уйлана башлауы, дингә ҡайтыуы ифрат һөйө­нөслө, – тине үҙ сығышында мөфтөй Нурмөхәмәт хәҙрәт Ниғмәтуллин. – Туған телебеҙҙең, әҙәбиәтебеҙҙең, сәнғәтебеҙҙең, мәҙәниәтебеҙҙең, ере­беҙҙең киләсәге дингә барып тоташа.
Баймөхәмәт хәҙрәт Ғиззәтуллин халыҡты төрлө экстремистик ағым­дарҙан һаҡ булырға саҡырҙы, мәсет­тең буш тормаҫына, унда ғилемгә ҙур урын бүленеренә ышаныс белдерҙе.
Сарала Асия Нурфәйез ҡыҙының балалары, ейән-ейәнсәрҙәре, бүлә-бүләсәрҙәре исеменән ауыл хужа­лығы тармағы ветераны Булат Ишембәтов телмәр тотто, изге теләк­тәрен еткерҙе. Унан Октябрьский ҡалаһында үткән Ҡурай байрамы лауреаттары – Асия инәйҙең бүлә­ләре Эльмаз Ишембәтов менән Марат Исмәғилев ҡурайҙа төрлө көйҙәр уйнап ишеттерҙе.
Мәсеткә инеп йәмәғәт менән намаҙ уҡығандан һуң, сарала ҡат­нашыусылар Урсапҡан туғайына йүнәлде. Унда халыҡ өсөн ҙур һабантуй ойошторолдо. Байрам уңайы­нан Ишембәтовтар, Ишҡыуа­товтар, Мөхәмәтшиндар, Байымов­тар, Мөьминевтәр ҡорбан салғайны. Аш мәжлесе менән бер рәттән туғайҙа райондың халыҡ ижады үҙә­ге артистары тарафынан ҙур концерт ҡуйылды, төрлө спорт ярыштары үтте, конкурстар ойошторолдо.
Шулай итеп, Йәрмөхәмәт ауылы тарихының өр-яңы бите асылды. Төрлө һынауҙарға бирешмәй, ул артабан да үҫһен, яҡты киләсәккә ынтылһын, өмөтлө быуын тәрбиә­ләһен, иншаллаһ!