Күптән түгел Суд приставтары федераль хеҙмәтенең Башҡортостан буйынса идаралығының Өфө ҡалаһының Калинин районындағы хеҙмәткәрҙәре “Башагроинвест” йәмғиәте урынлашҡан йортто бушатыу буйынса суд ҡарарын республиканың Ер һәм мөлкәт мөнәсәбәттәре министрлығы файҙаһына атҡарҙы. Суд йәмғиәттең йәшәү өсөн тәғәйенләнмәгән бинаны законһыҙ биләүен, уға бер ниндәй ҙә хоҡуҡи документтары булмауын асыҡланы һәм бушатыу тураһында ҡарар сығарҙы.

Башҡарыу производствоһы быйыл октябрҙә ҡуҙғатылған, шул ваҡыттан алып суд приставы-башҡарыусы бер нисә тапҡыр ойош­ма етәксеһенә бинаны бушатыу талабын ҡуйған, ләкин мөрәжәғәт инҡар ителгән. Етәксе, Енәйәт кодексының 315-се статьяһы буйынса яуаплылыҡ тураһында иҫкәртелһә лә, ирекле рәүештә суд ҡарарын үтәргә теләмәгәс 50 мең һум күләмендә штраф түләйәсәк.

Балаларҙы мәктәпкә әҙерләнек

Белем көнө алдынан Суд приставтары федераль хеҙмәтенең Башҡортостан буйынса идаралығы «Баланы мәктәпкә әҙерлә” акцияһын үткәрҙе. Белгестәр алимент түләмәгәндәрҙе, өйҙәренә барып, бурыстары тураһында иҫкәртте. Бындай саралар Идаралыҡ тарафынан бишенсе йыл рәттән ойошторола.

Акция иң тәүҙә алимент түләүҙәрҙе йәнләндереүгә һәм йәмәғәт­селектең иғтибарын был проблемаға йәлеп итеүгә йүнәлтелгән. Бынан тыш, бәлиғ булмаған баланың хоҡуғын, законлы мәнфәғәт­тәрен яҡлау, алимент түләргә теләмәгән ата-әсәнең балаларын ҡурсалау маҡсаты күҙ уңында тотола. Акция барышында суд прис­тавтары-башҡарыусылар, бурыслыларҙың мөлкәт торошон асыҡ­лау маҡсатында, улар йәшәгән урындарға барҙы, эшләгән ойош­маларҙың бухгалтерияларын тикшерҙе. Законға ярашлы, али­мент бурыслы граждандың эш хаҡынан ваҡытында һәм ту­лыһынса тотоп барылырға тейеш. Осрашыуҙар ваҡытында бел­гестәр Суд приставтары федераль хеҙмәтенең Баш­ҡортостан буйынса идаралығы өсөн дизайнер Елена Юшкова эшләгән “Сит балалар булмай” исемле календарь-иҫкәрмәләр таратты.


“Мәрхәмәтле билет” алайыҡ

Хәйриә акцияһы барышында Суд приставтары федераль хеҙмәтенең Башҡортостан буйынса идаралығы хеҙмәткәрҙәре ата-әсәләренең алимент буйынса бурыстары булған 20 балаға байрам ойошторҙо – уларҙы зоопаркка алып барҙы.

Зоопарк хеҙмәткәрҙәре ҡыҙ һәм малайҙарға дөйә­ғош­тар, ташбаҡалар, кәзә һәм һарыҡ бәрәстәре, ҡырғауыл, тауис, те­йен, диңгеҙ сусҡалары, сусҡа бәрәстәре, шулай уҡ декоратив то­ҡомло тауыҡ һәм әтәстәр хаҡында ҡыҙыҡлы итеп һөйләне. Балаларға ҡайһы бер хайуандарҙы ашатырға, хатта вольер эсенә инергә лә рөхсәт иттеләр. Зоопаркта булғандан һуң бәләкәстәр киноға барҙы.
– Суд приставтарының балаларға булған иғтибарынан бик ҡәнәғәтбеҙ. Улар кескәйҙәргә шәп байрам әҙерләгән. Элекке ирем балаларҙы бағыуға бер тин дә аҡса күсермәй тиерлек, эшләмәй, эсә. Минең хеҙмәт хаҡым бигерәк аҙ. Балаларҙың ялын ойош­тороуға аҡсам етмәй. “Мәрхәмәтле билет” акцияһы өсөн барыһына ла рәхмәт, — тине Өфө ҡалаһында йәшәүсе Светлана Н.