Быйыл беҙҙәге өс участкала һайлау бюллетен­дәрен эшкәртеү комплекстары ҡуйылды. Улар, беренсенән, комиссия ағзаларының эшен күпкә еңеләйтһә, икенсенән, тауыш биреү йомғаҡтарының ғәҙеллегенә ышанысты арттыра. Был аппараттарҙы хеҙмәтләндереү хәл иткес тауыш хоҡуғына эйә булған комиссия ағзалары араһы­нан бил­дәләнгән махсус операторға йөкмәтелгән. Улар тейешле теоретик һәм практик әҙерлек үтте, бюлле­тендәр эшкәртеү комплексы менән эшләргә рөхсәт биргән танытма алды.
Хоҡуҡ һаҡлау органдары менән тығыҙ хеҙмәттәшлек итәбеҙ. Иң мөһиме – комиссия ағзаларының һәм һайлау­сыларҙың именлеге.
Эшебеҙ барыһы өсөн дә тулыһынса асыҡ булырға тейешлеген онотмайбыҙ. Был йәһәттән ҡала гәзите редак­цияһында “тура бәйләнеш” ойошторҙоҡ, урындағы матбуғат баҫмаларында, телевидение каналдарында тейешле мәғлүмәтте даими биреп барҙыҡ.
Республиканың Үҙәк һайлау комиссияһы рәйесе Хәй­ҙәр Вәлиев, ҡалабыҙҙа булып, һайлауға әҙерлек эштә­ренә ыңғай баһа бирҙе. Башҡортостан Президентын ваҡытынан алда һайлауҙы тейешле кимәлдә үткәрәсәк­беҙ, тип тулы ышаныс менән әйтә алам.