– Ҡуртымға күл алып, мәшәҡәт­тә­ре­геҙҙе арттырғанһығыҙ түгелме, Марат Хаммат улы?
– Ысынлап та, ауыр хеҙмәт, тәүлек әйләнәһенә эшләргә кәрәк. Ниәтемә ҡатыным ҡаршы килмәне, балаларым да ярҙам итеп тора. Беҙҙә күлдәр күп. Уларҙың тәрбиәләп тотолғандары бар, ҡарауһыҙҙары ла етерлек.
– Белеүемсә, юғары уҡыу йортонда зоотехник һөнәрен алып, ферма мөдиренән башланған хеҙ­мәт юлығыҙ ифрат бай: урын­дағы депутаттар советына етәк­селек иткәнһегеҙ, урман ху­жа­лығы директоры булған­һығыҙ, халыҡ контроле комитетында уңышлы эшләгән­һегеҙ... “Башҡортостандың мәғариф алдынғыһы” тигән исемегеҙ ҙә бар. Етештереү өлкәһендә хеҙмәт иткән кешене бындай награда нисек килеп тапҡан һуң?
– Урман хужалығына етәкселек иткән осорҙа туғыҙ мәктәп төҙөнөк. Аҙаҡтан ошондай юғары исем биреп, эшемде баһалағандары өсөн бары­һына ла ҙур рәхмәтлемен.
Ҡыҙғанысҡа ҡаршы, хәҙер тармаҡ­тар бер-береһе менән элекке кеүек үк тығыҙ хеҙмәттәшлек итмәй. Ауыл хужалығына ҡараш үҙгәрҙе, күп ерҙә фермалар, мал бөтөрөлдө. Һөҙөмтәлә урындағы халыҡтың байтағы эшһеҙ ҡалды.
Үҙемә килгәндә, хаҡлы ялда булһам да, ҡул ҡаушырып ултырғы килмәне: күңелем балыҡсылыҡты үҙ иткән­лектән, ике күлде ҡуртымға алдым. Уларға селбәрә ебәрҙек, үҫкәндәрен тотоп, һатыуға сығарабыҙ.
– Эшегеҙҙе башлап ебәргәндә ярҙам иттеләрме?
– Яҡшы ғына булышлыҡ иттеләр, барыһына ла рәхмәт. Шуныһы ҡыуаныслы: район етәкселеге күлдәрҙе ерле халыҡҡа ҡуртымға бирергә тырыша. Төп маҡсатыбыҙ — һыу ятҡылығын, балыҡтарҙы һаҡлау. Юғиһә һуңғы йылдарҙа моторлы кәмәлә йөрөгәндәр күбәйҙе. Бер хыялым бар: һәүәҫкәр балыҡсыларға ҡармаҡлау өсөн яҡшы шарттар тыуҙырырға ине.
– Һеҙҙең юлды һайлағандарға ниндәй кәңәш бирер инегеҙ?
– Бындай аҙымды яһаған кеше тәү сиратта хеҙмәт яратырға тейеш. Шулай уҡ күлде йәки быуаны яҡшы итеп өйрәнһен, унда ниндәй балыҡтар ебәрергә кәрәклеген белһен. Эште фәнгә бәйләп алып барыу мөһим.
– Әңгәмәгеҙ өсөн рәхмәт. Эшегеҙҙә уңыштар теләйбеҙ.