Райондың баш агрономы Радик Рәхмәтуллин менән Уҫаҡ түше тигән урындағы арпа баҫыуына юл тоттоҡ. Бер-береһе менән уҙышып, 160 гектар майҙанды өс баҫыу карабы гиҙә, бер яҡ ситтәрәк “КамАЗ” водителе Дамир Үҙәнбаев ырҙын табағына аш­лыҡ ташыу өсөн әҙер ултыра. Хужалыҡ агрономы Урал Әхмәтйәнов әйтеүенсә, бы­йыл­ғы йыл өсөн уңыш насар түгел. Дөйөм алғанда, гектар көсө туғыҙ центнер тәшкил итһә, арпаныҡы – 12. Һәр хәлдә, киләһе йылға тулы­һынса орлоҡ запасы туплай аласаҡтар. Хужалыҡ районда беренселәрҙән бу­лып ужым арышын йы­йыуҙы тамам­ла­ған, арпаны йыйып алғас, һолоға төшәсәктәр. Артабан инде бойҙайҙы юғал­тыуһыҙ һуғып алыу бурысы тора.
Урып һуғыуҙа хужа­лыҡтың тәжрибәле комбайнсылары Зөфәр Үтәбаев, Альбрет Шаһ­моратов менән Закир Балхин юғары һөҙөмтә күрһәтә. Игенселәр өсөн төшкө аш килтерелә, шуға ла ялан-ҡырҙа өҙлөк­һөҙ эш ҡайнай.
Һүҙ юҡ, ҡоролоҡтан ғына түгел, ҡара сиңерткәнән дә зы­ян күргән күп хужал­ыҡтар­ҙың хәле яҡшынан түгел. Ураҡтың иң ҡыҙған мәле булыуға ҡарамаҫтан, яғыулыҡ етмәү мәсьәләһе лә борсой. Федераль һәм республика ҡаҙна­һынан бүлен­гән субси­дия­­лар ваҡытында бирелмәй. Һаулыҡ һаҡлау, мәғариф өл­кәһендәге “ҡағыҙ воло­ки­таһы” ауыл ху­жалы­ғына ла килеп етте, ахыры – иртә таңдан баҫыуҙа йөрөргә тейеш булған күп агрономдар бөгөн төшкә ҡәҙәр бүлмәлә төрлө хатҡа яуап яҙып ултырырға мәжбүр. Ауыл хужалығы министр­лығына ла элекке ке­үек үҫтергән иге­неңде күрһә­тергә түгел, ә бер бүлмәнән икенсеһенә йөрөп, төрлө до­кументтарға бихисап ҡултамға йыйыу өсөн йыш барырға тура килә.
Нисек кенә булмаһын, йыл да икмәк үҫ­тереүселәр ерен һөрә, орло­ғон сәсә, әммә көткән уңышын йыя алмай. Һаман да игенгә хаҡтың бер кимәлдә ҡалыуы, яғыулыҡ менән тотҡарлыҡтар булыуы, уларға йәнә тәбиғәт­тең мәр­хәмәтһеҙ­леге лә ҡушылһа, ерҙе һөйгәндәрҙең дә түҙем­леге шартлап өҙөл­мәҫ ти­мә. Тейешле ярҙам, хөр­мәт һәм ҡәҙер уларға хәҙер кәрәк. Ә иртәгә һуң булыуы мөмкин.