Уға дошмандарҙың һөжү­мен, алышты, дуҫтарын юғал­тыуҙы – барыһын да күрергә тура килә. Радик Марат улы Афғанстандағы хеҙмәте өсөн «Рәхмәтле Афған халҡынан», «СССР-ҙың дәүләт сиген һаҡлауҙа батырлыҡ күрһәтеүе өсөн» тигән миҙалдар менән бүләкләнгән.
1989 йылдың 15 февралендә Амударъя йылғаһы аша һалынған 800 метрлыҡ “Совет-Афған дуҫлығы” күпере өҫтөндә 40-сы армия етәксеһе генерал Гро­мовтың: “Минән һуң бер совет һалдаты ла ҡал­маны”, — тигән ҡанатлы һүҙҙәре яңғырағас, Радик­тарҙың төркөмө совет ғәскәр­ҙәренең именлеген һаҡлап, алты сәғәт үткәс кенә ил сигенән сыға.
Хеҙмәттән ҡайтҡас, баш ҡалабыҙҙа тәүләп ойош­торолған ОМОН-да эш башлай. Ситтән тороп Өфө технология һәм сервис институтын тамамлай. Ватанына һөйөү көслө бул­ғанлыҡтан, Радик ғаиләһе менән тыуған яғына ҡайтып, оҙаҡ йылдар эске эштәр бүлегендә эшләй.
Радик Марат улы өс тапҡыр Чечен Республика­һында контракт буйынса хеҙмәт итеп ҡайта. Ата-әсә­һенә килгән Рәхмәт хатында түбәндәге юлдар бар: «Хәрби хеҙмәт ваҡытында үҙен эшлекле, талапсан, ҡатмарлы шарттарҙа дөрөҫ ҡарар ҡабул итеү­гә һә­ләтле, белемле хеҙмәткәр итеп күр­һәт­те». Ҡорал­лы енәйәтсене тотҡанда күрһәткән ба­тырлығы өсөн «Ҡаһарманлыҡ» ордены менән бүләк­ләнгән.
Утты-һыуҙы кискән, күпте күргән полиция подполковнигы бөгөн дә илебеҙ һағында. Икенсе юғары юридик белем ала. Өфө ҡалаһының Орджоникидзе районы эске эштәр бүле­генең участка инспекторҙары начальнигы вазифаһын башҡара, ОМОН-да хеҙмәт итә. Радик Марат улы — өлгөлө тормош иптәше, яҡшы атай ҙа. Йәмәғәте — республика милли музе­йының ғилми хеҙмәткәре Асия Фәйрүз ҡыҙы менән ике ҡыҙ тәрбиәләйҙәр. Оло ҡыҙҙары Алиса — була­саҡ хирург, Башҡорт дәүләт медицина университеты студенткаһы, Ләлә Ф. Мостафина исемендәге 20-се ҡала гимназияһында уҡый. Күптән түгел Закирйәнов­тар ғаиләһе ОМОН хеҙмәткәрҙәре өсөн төҙөлгән яңы йорттан фатир алып, өй туйланы.