— Быйыл беҙҙең төбәкте шифалы ямғырҙар иркәлә­мәне. Әммә 4500 гектар майҙанда иген культуралары сәсеп, үҙебеҙгә етерлек уңыш алып һөйөндөк, — тине Олег Геннадьевич.
Механизаторҙар Анатолий Копылов, Николай Адмайкин 135 гектарҙа “сулпан-2” арышын сәсеүҙе тамамлау өҫтөндә. Илдар Солтанов иһә ерҙе эшкәртеү менән шөғөлләнә. Йәмғиәт 50 кешегә даими эш урыны биргән, йәйге ҡыҙыу осорҙа уларҙың һаны 100-гә етә. Ялсы, Гавриловка, Түләбай, Семенов-Петровский ауылдарын берләштергән “Иртө­бәк” йәмғиәтенең иң ҙур ҡыуанысы — “500 ферма” програм­маһында ҡатнашыу. Һәр һыйырҙан 3650 килограмм һөт һауыла, уны Мәләүез һөт-консерва заводына оҙаталар.
— 200 һауын һыйырыбыҙ бар. Көн дә һөттән 40 мең һум табыш килә. “500 ферма” программаһы буйынса беҙгә 15 миллион һум аҡса бүленде. Әле өс бинала ремонт эштәрен теүәл­ләйбеҙ. Һыйыр малын 400 башҡа тиклем арттырырға иҫәп тотабыҙ, — тине етәк­се.
Ысынлап та, ҡыҙыу мәл. Элекке ферманы заманса итеп үҙгәртеп ҡороуға көс, ҡеүәт кәрәк шул. Шуныһы һөйөнөслө: йәш­тәр ауылда ҡала, ғаилә ҡора, йорт төҙөй.