Был юлы конкурста республиканың иң оҫта токарҙары ҡатнашты. Хәтерегеҙгә төшөрәбеҙ: бәйге йыл һайын төрлө номинацияларҙа үткәрелә. Әйтәйек, былтыр ярышта күпер краны машинистары көс һынашһа, унан алдағы йылда иң яҡшы иретеп йәбештереүсене билдәләгәйнеләр.
Ойоштороусылар әйтеүенсә, төп маҡсат — токарь һөнәренең абруйын арттырыу, был хеҙмәт төрөнә йәштәрҙе ылыҡтырыу, кадрҙар мәсьәләһен көйләү. Бындай бор­солоуҙарҙың сәбәбе билдәле: бөгөн эшсе һөнәрҙәре лайыҡ­лы баһаланмай. Конкурста ҡатнашыусыларҙың барыһы ла тиерлек (21 йәшлек бер егеттән башҡа) 50-60 йәшлек ирҙәр булыуын иҫәпкә алғанда, уйланырлыҡ урын бар.
– Токарь булып эшләүемә егерме йылдан ашыу. Һөнәремде бик яратам. Шуға уның киләсәге өсөн борсолам — йәштәр килмәй. Ә бит завод-фабрикаларҙа бөтә нәмәне компьютерға ғына япһарып булмай. Заман технологияларын нисек кенә маҡтаһаҡ та, эшсе ҡулдарһыҙ ярамай, — ти Нефтекама ҡалаһындағы нефть промыслаһы ҡорамалдары заводынан килгән Александр Беляев.
Ярыштар үтә лә китә, маҡсаттар ғына һөҙөмтәһеҙ ҡалмаһын. Ә еңеүселәргә килгәндә, уларҙы үҙ һөнәрен бар күңелен һалып башҡарған оҫталар араһынан һайлап алыуы еңел булманы. Һөҙөмтәлә Өфөнән Юрий Койков алдынғылыҡты бирмәне. Еңеүсе артабан Башҡортостан данын ил кимәлендә яҡлаясаҡ.