Шакир ауылында йәшәгән Садиҡовтар, күпләп умарта тот­ҡанлыҡтан, бигерәк тә йәй ур­таһында еңде нығыраҡ һыҙ­ға­нып ала. Улар менән осрашыуым эштәренең тығыҙ ваҡытына – ҡорттарҙың баҡса-йорт тирәләй гөжләп осоуы һәм бал ағыҙыу мәленә — тура килде. Әле һаман ҡартайырға ашыҡмай, етеҙ йүгергеләп йөрөгән Рәүил Садиҡовҡа 85 йәште һис бирмәҫһең! Һуғыш йылдарының яфаларын етерлек татыған тыл һәм хеҙмәт ветерандарының бөгөн дә ҡул ҡау­шырмай, йәштәрҙән ҡа­лыш­май донъя көтөүенә ғә­жәп­ләнергә лә түгел, сөнки ҡы­рыҫ һәм аяуһыҙ йылдар, аслыҡ-яланғаслыҡ, юғалтыуҙар һәм өҙлөкһөҙ хеҙмәт уларҙы ғүмер­леккә сыныҡтырған, рухтарын нығытҡан. Шуға ла оло быуын­дың әүҙем тормошо һәр кемдә һоҡланыу уята, күптәр өсөн фәһемле һабаҡ булырлыҡ.
1954 йылда ғаилә усағы ҡабыҙған Рауза һәм Рәүил Са­диҡовтар тормош һынауҙарына бирешмәй, итәк тултырып балалар үҫтерә. Тәүҙә йорт һатып алһалар, һуңынан үҙ көстәре менән яңыһын ҡалҡыталар.
Рәүил Дилмөхәмәт улының 12 йәштән ауыр ер эшенән башланған хеҙмәт йылъяҙмаһы тулыланғандан-тулылана. Ат ҡарай, яҙғы сәсеүҙә һабан артына баҫа, көҙөн көлтә ташый, Ҡарлыманға ашлыҡ илтеүҙә лә ҡатнаша, Белорет урмандарында ағас ҡырҡыуҙан дә ситтә ҡалмай ул. Рауза Әғләметдин ҡыҙы менән бергәләп совхозда быҙау ҡарайҙар. Артабан Рәүил Дилмөхәмәт улы ҡулла­ныу­сылар йәмғиәтенә күсә. Ошо өлкәләге 28 йыллыҡ намыҫлы хеҙмәте Маҡтау ҡағыҙҙары, бүләктәр менән баһалана.
Рауза Садиҡова ғәзиз­дә­ре­нә, иренә иғтибарын, һөйөүен йәлләмәй. Өй мәшәҡәттәренән тыш, ауыл Советында йыйыштырыусы, магазинда һатыусы була. Гектарлап сөгөлдөр эш­кәртеүҙә лә ал-ял белмәй. Шул саҡтарҙы хәтеренә төшө­рөп, хужабикә:
— Үҙем — Ҡырмыҫҡалы районының Иҫке Шәрәй ауылынан. Рәүил менән мине эш таныштырҙы тиһәм дә була: бер йыйылышта президиумға һайланғайныҡ. Беҙҙе заман төр­лө яҡлап һынаны. Рәүил менән татыу, берҙәм булғас, тормош ауырлыҡтары күңелде төшөр­мәне. Бик тырыш, егәрле булды ирем. Ана бит, әле лә тик ултыра белмәй, — тип тормош иптәшенең тынғыһыҙлығына ишараланы.
Рәүил Дилмөхәмәт улы ла хәләл ефетенә бик рәхмәтле:
— Бәләкәйҙән ҡулдар һө­йәл­ләнде. Үтә ауыр дәүерҙең ҡы­йынлыҡтарын еңеп, ошо йәшкә етеүемә ана шул хеҙмәт сә­бәпселер. Аяғым һыныуына ҡа­рамаҫтан, бирешмәнем. Әл­дә янымда хәстәрле ҡатыным бар, тип һөйөнәм. Йорт-ҡура мәшә­ҡәтенән бушамайбыҙ, кө­нө бу­йы аяғөҫтө беҙ.
Бал менән туп-тулы рамдар­ҙы ташыған Рәүил Садиҡов өй­ҙә осоп йөрөгән ҡорттарҙы ҡы­уып маташҡанымды күреп, мәрәкәләп тә алды. Хәләл ефе­те татлы ризыҡты ҡыуыусы ҡулайламаны әйләндерә-әйлән­дерә һүҙен дауам итте:
— Иңде-иңгә терәп татыу­лыҡта йәшәүебеҙгә быйыл июл­дә 60 йыл тулды. Шөкөр, тип ҡуябыҙ. Бала-сағабыҙ, буй еткереп, ҡошсоҡтарҙай таралышты. Дүрт ҡыҙ өйөбөҙ биҙәге булһа, алты улыбыҙ – терәк-таянысыбыҙ. Һәр береһенә яҡшы тәрбиә бирергә тырыш­тыҡ. Тыуған йорттарына тартылып торалар. Рөстәм улыбыҙ беҙҙең менән йәшәй.
Гәүһәр туйҙарын билдәләп, үткән йылдарҙы барлай-барлай, ун балаһының, 17 ейән-ейәнсәре һәм ете бүләһенең шатлыҡ-ҡыуаныстарын ур­таҡ­ла­шып йәшәй Герой-әсә Рауза Әғләметдин ҡыҙы һәм хеҙмәт ветераны Рәүил Дилмөхәмәт улы. Туҡһанды ваҡлаған аҡһа­ҡал менән ағинәйҙең яҙмышы кешеләрҙе бары мөхәббәттең, хеҙмәттең йәшнәтеп йәшә­те­үенә ысын мәғәнәһендә инандыра.