1987 йылда Баймаҡ районының Йомаш ауылында йәшәүсе Яналиндар ғаиләһендә бер малай донъяға килә, уға Вадим тип исем ҡушалар. Ҡыҙғанысҡа ҡаршы, тора-бара уның күреү һәләтенән мәхрүм булыуы асыҡлана.
­­Атай-әсәйе улдарын төрлө табиптарға күрһәтеп ҡарай, әммә файҙаһы булмай. Шулай ҙа төшөнкөлөккә бирелмәй улар, Вадимды Өфөләге 28-се һөнәри мәктәпкә уҡырға бирәләр. Уны уңышлы тамамла­ған­дан һуң, маҡсатҡа ынтылышлы, тырыш егет медицина колледжына уҡырға инә, артабан массаж яһауcы һөнәрен үҙләштерә. Бына ете йыл инде ул Өфө дауахана­ла­рының береһендә һайлаған һөнәре буйынса уңышлы эшләп йөрөй.
Вадимдың башҡарған эшенән барыһы ла ҡәнәғәт. Пациенттар уға һәр ваҡыт рәх­мәтле. “Бынан кире массаж яһатырға тик Яналинға ғына йөрөйәсәкмен”, “Уның кеүек массаж яһаусы осрағаны булманы әле”, – ти улар. Егерме ете йәшлек белгестең һөнәре генә түгел, спорт, музыка буйынса ла маҡтау ҡағыҙҙары бихисап.
Илһамлы, әүҙем егет тормошта юғалып ҡалмай, күңеленә хуш килгән һөнәр үҙ­ләш­тереп, уңышлы эшләп йөрөй. Күп йәштәр эш юҡлыҡҡа һылтанып, ваҡытты бушҡа уҙғарып ятҡанда, һаулыҡ мөмкинлеге сик­ләнгән йәш кеше үҙ юлын тапҡан. Донъяның матурлығын маңлай күҙе менән күрмәһә лә, күңел күҙе менән тойоп, ҡәҙерен белеп йә­шәй Вадим!