­Көтөп алған йәйге канику­лығыҙҙың бер өлөшөн һоҡ­ланғыс тәбиғәт мөйөшөндә, йәмле Ағиҙел буйында үткә­рер инегеҙме, дуҫтар? Әл­биттә, тиерһегеҙ. Ә бына Бөр­йән райо­ны уҡыусылары бындай хозурлыҡта йыл да кинәнә.
Ундағы Күҙәмбәт туғайын­да урынлашҡан “Ағиҙел” балалар лагеры йәй да­уа­мында гөрләп эшләй. Әйткәндәй, бөрйәндәр генә ял итмәй бында, тәбиғәт ҡосағына рес­публиканың башҡа ра­йон-ҡалаларынан да килеп етәләр.
– Тәүге ике сменала бергә ике йөҙҙән ашыу бала ял итте, – ти лагерҙың етәксеһе Әхәт Әбдрәхимов. – Өсөн­сөһөнә йөҙ самаһы уҡыу­сыны ҡабул иттек. Ялды күңелле лә, файҙалы ла итеп уҙғарыу өсөн барлыҡ шарт­тар тыуҙырылған “Ағи­ҙел”дә. Спорт майҙансығының, би­лә­мәләге сәхнәнең буш тор­ғаны юҡ тип әйтерлек. Тәүге сменала ял иткән балалар Ағиҙелдә көн дә һыу инеп кинәнде. Июлдә иһә, һауа торошоноң бер аҙ “үпкәләп”, “асыуланып” алыуы сәбәпле, ундай мөмкинлек булманы. Шуға ҡарамаҫтан, лагерҙа тормош гөрләп торҙо.
Икенсе сменала ял иткән­дәргә умартасылыҡ серҙә­ренә өйрәнеү бәхете тейгән икән. Балалар яҡындағы Ян­һары ауылы мәктәбенең умар­талығында дәрес алған. Лагерҙың өлкән вожатыйы Гөлнара Шәмиғолованың әйте­үенсә, бындай сараның төп маҡсаты – йәш бөрйән­дәрҙе тыуған яғының бай­лығын һаҡларға әйҙәү, ата-бабанан ҡалған кәсеп­тәр­ҙе дауам итеү мөһим­леген аңлатыу.
– Һәр төбәктең матур ки­лә­сәге – уның йәш быуыны ҡулында, – ти Гөлнара Ғә­фүр ҡыҙы. – Ошоно белеп үҫһен­дәр өсөн лагерҙа ял итеү­се­ләрҙе экскурсияларға йыш алып сығабыҙ. Балалар, мәҫә­лән, заповедникка, Шүлгән мәмерйәһенә, музей­ҙарға, Инсе­бикә ҡаяһы яны­на сәйә­хәткә ҙур ихласлыҡ менән йө­рөй. “Ошо ерҙәрҙең байлығы ки­лә­сәктә тап һеҙ­ҙең хәстәр­леккә мохтаж бу­ласаҡ” тигән һүҙҙәребеҙҙе, туризмға бәйле кәңәштәре­беҙҙе етдилек ме­нән тыңлай.
“Ағиҙел” тәжрибәле вожа­тый­ҙар, тәрбиәселәр менән тәьмин ителгән. Мәҫәлән, Таң­сулпан Ғәбиҙуллина бын­да етенсе йыл эшләй.
– Мәктәптә отпуск бире­леү менән лагерға юлланам, – ти ул. – Йәйҙе ошо лагер­ҙан, унда ял иткән бала­ларҙан тыш күҙ алдына ла килтерә алмайым. Өҫтәүенә эш хаҡы ла байтаҡ – баланы яңы уҡыу йылына әҙерләргә ҙур ярҙам.