Өсбүлә ылында республика етәк­сеһе аҙ ҡатлы төҙөлөш өсөн заманса материалдар, энергия һаҡлау техноло­гияһы, инженерлыҡ селтәрҙәре һәм ком­муникациялар сағылдырылған күр­гәҙмәне ҡарап сыҡты, артабан Йәштәр биҫтәһендәге төҙөлөш менән танышты. “Ауылды социаль үҫтереү” айырым маҡ­сатлы федераль программаға яраш­лы, Киров исемендәге тоҡомсолоҡ заводы көсө менән бында йыл һайын йәш белгестәр өсөн торлаҡ һалына. Баш­ҡортостан етәксеһе ике йортта төҙө­лөш эштәре сифатын ҡараны, өй туй­лаусылар менән аралашты.
Иҫке Байыш ауылында Рөстәм Хә­митов “Рәсәй” тоҡомсолоҡ заводында йорт комплекттарын ҡороу буйынса эш тәжрибәһе менән танышты. Бында яңы Мәктәп һәм Сочи урамдары барлыҡҡа килә. “Йорт комплекты” проектына яраш­лы, былтыр — бер, быйыл 10 йорт һалынған. Яңы өйҙәрҙәге бер квадрат метрҙың хаҡы — 10 мең һум.
Рөстәм Хәмитов киләһе урамды Ҡырым урамы тип атарға тәҡдим итте.
Дүртөйлө ҡалаһында төбәк башлы­ғы Бөйөк Ватан һуғышы ветерандарына һәм етем балаларға фатир ас­ҡыстары тапшырҙы. Генерал Шайморатов урамындағы биш ҡатлы өр-яңы йорттан 18 социаль фатир бүленгән. Быйыл өсөнсө кварталда ошондай уҡ икенсе йортто сафҡа индереү күҙал­лана.
Ҡалала Рөстәм Хәмитов аҙ ҡатлы төҙөлөштө үҫтереү мәсьәләләре буйынса республика кәңәшмәһен үткәрҙе.
– Ошондай етди сараның Дүртөйлө­лә уҙғарылыуы осраҡлы түгел. Һеҙҙең ошо өлкәләге тәжрибәгеҙҙе һәм ҡаҙа­ныштарығыҙҙы өйрәндек. Иң мөһиме, әлбиттә, кешеләрҙең ҡәнәғәт булыуы, – тине Рөстәм Хәмитов. – Күләм әллә ни ҙур булмаһа ла, алға китеш бар. Әй­тергә кәрәк, һуңғы йылдарҙа республикала торлаҡ төҙөлөшө һиҙелерлек йән­ләнде: дүрт йылда туғыҙ миллион квадрат метр самаһы торлаҡ төҙөлдө, шуның алты миллион квадрат метр­ҙан ашыуын шәхси йорттар тәшкил итә. Былтыр тәүге тапҡыр 2,5 миллион квадрат метрлыҡ сикте үттек. Был күрһәткес буйынса Волга буйы федераль округында алдынғыбыҙ һәм Рәсәйҙә иң яҡшы биш төбәк иҫәбенә инәбеҙ.