Контроль-иҫәп палатаһындағы бындай ҡыҙыу бәхәс һис кенә лә ғәҙәти күренеш түгел. Етешһеҙлектәрҙе асыҡлаған аудиторҙар үҙҙәрен тыныс ҡына тота алмай. Шифахана етәксеһе аҡланырға тырыша. Асыҡланған кәмселектәр байтаҡ: тейешле лицензияһыҙ медицина хеҙ­мәттәре күрһәтелгән, ашханалағы аҙыҡ-түлектең пациенттарҙың сәләмәтлеге өсөн хәүефле икәнлеге билдәләнгән, шифаханала психотроп матдәләр һаҡланған, өҫтәүенә финанс эшмәкәрлеге ҡыуан­дырырлыҡ түгел. Контроль-иҫәп палатаһы аудиторы Елена Петрова:
– Тикшереү барышында 170 миллион һумлыҡ финанс етешһеҙлеге асыҡланды, был һан шифахана алған табыштың 40 процентын тәшкил итә, – тип билдәләне.
Шифахана директоры Рәмил Бәҙретдинов иһә, шифахананы бөлгөнлөккә төшкән ерҙән күтәреп алдыҡ, тигән фекерҙә.
– Көрсөктө уңышлы үтеү өсөн өс йыл самаһы ваҡыт кәрәк. Әлеге мәлгә байтаҡ эш башҡарылған. Ун яңы бүлектән торған дауалау-диагностика комплексы сафҡа инде. Шифахана яңыртылды, – тине ул.
Ултырышта ҡатнашыусылар шифахана хеҙмәткәрҙәрен ҡыҫҡартыу сәбәптәрен дә аңлай алманы. Контроль-иҫәп палатаһы мәғлүмәттәренә ярашлы, ике йыл ярым эсендә учреждение персоналы тулыһынса яңыртылған. Дәүләт Йыйылышы – Ҡоролтай комитеты рәйесе Николай Никитин:
– Унда хәтәр эштәр ҡылынған. 2012 йылда – 249 кеше, ә 2013 йылда 200 кеше эшенән бушатылған. Бер сәбәпһеҙ. Улар эсә торғайны тип аҡланалар, әммә был һүҙҙәрҙең дөрөҫлөккә тап килмәүе көн кеүек асыҡ, – тип ғәжәпләнеүен йәшермәне.
Рәмил Бәҙретдинов «Йәшел сау­ҡа­лыҡ»­ҡа тиклем «Янғантау» шифахана­һына етәкселек иткәйне. Бында ҡылынған эштәре буйынса яңыраҡ Салауат районы суды уға шартлы рәүештә хөкөм ҡарары сығарҙы. Башҡортостандың Һаулыҡ һаҡлау министрлығынан белдереүҙә­рен­сә, ошо хәлдәрҙе иҫәпкә алып, әле Рәмил Бәҙретдинов менән хеҙмәт килешеүен өҙөү тураһында ҡарар әҙерләнә. Контроль-иҫәп палатаһының сираттағы тик­шереү һөҙөмтәләре буйынса мәғлүмәт хоҡуҡ һаҡлау органдарына тапшыры­ласаҡ.