Мәктәптә уҡыу өсөн махсус йыһазландырылған логопед, психолог, информатика кабинеттары, спорт залы бар. Донъяны танып белеү, телмәрҙе үҫтереү йәһәтенән педагогтар ҙур эш башҡара. Мәктәп-интернат «Баш­ҡортостандың яңы гражданын формалаштырыу» прог­рам­маһы буйынса эшләүен дауам итә. Тәрбиә­­ләнеү­селәр Балалар ижады йортонда шөғөлләнә, музейҙарға йөрөй, ижади конкурстарҙа ҡатнашып призлы урындар яулай. Мәҫәлән, Башҡортостан Мәғариф министрлығы инициативаһы буйынса коррекцион мәктәптәр өсөн үткәрелгән махсус олимпиадала ҙур уңышҡа өлгәш­те­ләр. Беҙ, ата-әсәләр, балаларыбыҙҙы ошо мәктәп педагог­тарына ышанып тапшырабыҙ. Улар бында яҡшы ҡа­рал­ған, тәрбиәле, тамаҡтары туҡ, тейешле белем алалар.
Беҙҙең алға быйыл ҙур проблема килеп баҫты. Коррекцион мәктәпте район үҙәгенән ауыл еренә күсерергә теләйҙәр. Тормай ауылындағы мәктәп бинаһын тәҡдим итәләр. Ул Стәрлебаш ауылынан 10 километр алыҫ­лыҡта, оло юлдан 800 метрҙа урынлашҡан. Ҡышын юл таҙартылмай, ә ауырыу балаларға көнөнә ике-өс тапҡыр «Ашығыс ярҙам» саҡыртырға тура килә. Ауылға күсеү балаларҙы медицина ярҙамынан мәхрүм итәсәк. Яңы бина коррекцион мәктәп талаптарына бөтөнләй яуап бирмәй.
Хоҙай тарафынан рәнйетелгән балаларҙы ниңә йәнә үгәйһетергә һуң? Коррекцион мәктәп-интернатты Тормай ауылына күсереү балаларҙы заманса тәрбиә сараларынан, уңайлыҡтарҙан мәхрүм итеү тигән һүҙ.
Хөрмәтле редакция! Матбуғаттың көсөнә ҙур ышаныс менән балаларыбыҙға ярҙам итеүегеҙҙе — коррекцион мәктәпте ауылға күсереүгә юл ҡуймауығыҙҙы үтенеп һорайбыҙ.