Әлеге фотоны күреп, кемдәр хаҡында һүҙ барасағын аңлағанһығыҙҙыр. Эйе, был – Өфөлә йәшәгән Зәй­нетдиновтарҙың моңло ғаиләһе.
Ғаилә башлығы — республикабыҙҙа ғына түгел, Рә­сәйҙә, хатта бөтә донъяла билдәле ҡумыҙсы, Х. Әх­мәтов исемендәге Башҡорт дәүләт филармонияһы артисы Миңлеғәфүр Зәйнетдинов. Ул милли музыка ҡоралында оҫта уйнағаны, уны танытыуҙа ҙур эш башҡарғаны өсөн “Донъ­яның виртуоз ҡумыҙсыһы” тигән маҡтаулы исемгә, Шәйехзада Бабич исе­мендәге дәүләт йәштәр премияһына лайыҡ булды.
Музыканттың хәләл ефете Гөлгөнә иһә – оҫта бейеүсе. Заманында ул Дыуан районындағы “Дуҫ­лыҡ” халыҡ бейеүҙәре ан­сам­бленең солисы ла булған. Әлеге көндә Өфөнөң Ф. Мостафина исемендәге 20-се ҡала башҡорт гимназия­һында уҡы­та.
Зәйнетдиновтар ғаиләһендә өс бала тәрбиәләнә. Ләйсән, быйыл ғына мәктәпте тамамлап, Башҡорт дәүләт универ­ситетының иҡтисад фа­куль­­тетына уҡырға инде, Азамат VIII класҡа бара, ә Илүзәгә өс йәш кенә әле.
Алма ағасынан алыҫ төш­мәй, тиҙәр бит. Ләйсән — ҡумыҙҙа, ҡурайҙа, думбырала, гитарала, Азамат иһә ҡурайҙа, ҡумыҙҙа уйнай, бейей. Хатта кескәй Илүзә лә ағаһының ҡурай моңона үҙенсә тыпырлатып бейергә маташа!
– Йыр-моңға һөйөү нә­ҫелдән киләлер, – тип ихлас йылмая Башҡортостандың ат­ҡаҙанған мәҙәниәт хеҙмәткәре Миңлеғәфүр Зәйнетдинов. – Һәр балабыҙҙың музыкаға һә­ләте кескәйҙән үк төҫ­мөрләнә башланы. Мин күрмәгәндә йә ҡурайҙа һыҙҙыртырға маташалар, йә ҡумыҙҙа сирткеләп ҡарайҙар ине. Шөкөр, хәҙер ғаилә ансамбле менән төрлө сараларҙа сығыш яһайбыҙ.
Зәйнетдиновтар ғаиләһендә моң йәшәй. Ә инде ул сихри көс һәр ерҙә изгелек нурҙарын сәсә, тормошта бөтә ауырлыҡ­тарҙы ла еңеп сығырға ярҙам итә.
Әйткәндәй, ошо көндәрҙә Миңлеғәфүр Зәйнетдинов Германияның Лейпциг ҡалаһына юллана. Унда билдәле сәхнә оҫтаһы Халыҡ-ара ҡумыҙсылар фестивале-конгресында ҡатнашасаҡ. Замандашыбыҙға уңышлы сәфәр теләйбеҙ!