Федераль миграция хеҙмәте мәғлүмәттәренә ҡа­рағанда, әле ҡасаҡ статусы биреүҙе һорап 144 мең кеше мөрәжәғәт иткән. “Бөтә кимәлдәге власть органдарының бурысы ирекһеҙҙән күсеп килеүсе­ләргә мөмкин тиклем иғтибар биреү, тейешле ярҙам күрһәтеү”, — тип билдәләне Дмитрий Медведев.
Улар араһында хәстәрлеккә мохтаж булған балалар, ололар, инвалидтар бик күп. Ҡасаҡтарҙың күпселеген таныш булмаған кешеләр, шулай уҡ туғандары, дуҫтары һыйындырған. Ауыр мәлдә ярҙамға ашыҡҡан кешеләрҙең барыһына ла ҙур рәхмәт әйтергә теләйем, — тине Рәсәй Хөкүмәте Рәйесе.
Дмитрий Медведев, Хөкүмәт ҡарарына ярашлы, Украина граждандарын урынлаштырыу өсөн тө­бәктәргә трансферт бүленеүе хаҡында хәбәр итте. Ҡаҙна ассигнованиелары күләме 3,5 миллиард һум­дан ашыу тәшкил итә, шул иҫәптән әлеге кешеләрҙе ҡабул итеүҙе ойоштороуға Федераль миграция хеҙмәтенә 780 миллион һум бүленә.
21 июлгә тиклем Федераль миграция хеҙ­мәтенең Баш­ҡортостан идаралығында 1981 Украина гражданы иҫәпкә ҡуйылған. 1 апрелдән һуң респуб­ликаға 906 кеше килгән, шуларҙың 325-е миграция хеҙмәтенә мөрә­жәғәт иткән. 17 июлдә Рәсәйҙең Ғәҙәттән тыш хәлдәр министрлығы ебәргән самолетта Дондағы Ростовтан 101 кеше килгән булһа, ҡалған 805-е Башҡортостанға үҙаллы юлланған һәм туғандарында ваҡытлыса төпләнгән.
Республика Хөкүмәтендә власть органда­рының һәм ойошмаларҙың ошо өлкәләге ғәмәлдәрен көйләү буйынса оператив штаб эшләй. Украина граждандары өсөн Өфө дәүләт авиация техник һәм Башҡорт дәүләт университеттарының шифахана-профилакто­рийҙа­рын­да урындар бүленгән. Хеҙмәт һәм халыҡты социаль яҡлау министрлығында ҡасаҡтарҙы эшкә урынлаштырыу мәсьәләһе буйынса “ҡыҙыу элемтә” эшләй.