Эстония Салауатты Онотмай » Башҡортостан гәзите | Газета Башкортостан на башкирском языке. Архив материалов.

Башҡортостан гәзите » Йәмғиәт » Эстония Салауатты Онотмай

Эстония Салауатты Онотмай 16.07.2014 // Йәмғиәт

Яңыраҡ Әхмәтзәки Вәлиди исемендәге Милли китапханала Таллиннда баҫылған “Эстония иҫләй: Салауат Юлаев” тигән китаптың исем туйы үткәрелде. Сараға милли батырыбыҙҙың һуңғы төйәгенән — Балтик буйынан ҡунаҡтар саҡырылғайны. Флүзә Хәйруллинаның, эстон нәшриәте мөхәррире Сильви Айре-Виллоның һәм Таллинн университетының эстон филологияһы факультеты студенты, тәржемәсе Илнур Хәйруллиндың ялҡынлы сығыштары һәммәһенә лә оҡшаны.

– Башҡортостанда Салауат Юлаевты белмәгән кеше юҡтыр. Балаларҙы бишектән үк батырҙар хаҡында әкиәт, риүәйәттәр һөйләп, илһөйәр итеп үҫтерәһегеҙ, — тип билдәләне Флүзә Тимерғәзим ҡыҙы. — Ә бына Эстонияның Палдиски ҡалаһында батырыбыҙға һәйкәл ҡуйылһа ла, үкенескә ҡаршы, уның тураһында әҙ беләләр. Шуға ла китап сығарырға ҡарар иттек. Бында урыҫ һәм эстон телдәрендә Салауат Юлаевтың тормош юлы һәм ижадына ҡағылышлы мәҡәләләр урын алған. Ә шағирҙың “Уралым” тигән шиғыры башҡорт телендә баҫылған.
– Мин – Башҡортостан ерендә беренсе тапҡыр. Бындағы халыҡтың ҡунаҡсыллығына иҫем китте! Һәр ерҙә беҙҙе ололап ҡаршы алдылар. Салауат йыйынында ла булдыҡ. Бик оҡшаны, — тип тәьҫораттары менән бүлеште Сильви Айре-Вилло.
Осрашыу һуңында Башҡортостандың халыҡ шағиры Ҡәҙим Аралбай һәм шағирә, журналист Лариса Абдуллина, ҡунаҡтарға рәхмәт әйтеп, йылы һүҙҙәрен еткерҙе.

Автор: Гөлназ ХӘСӘНОВА. Район: Өфө ҡалаһы.

Баҫып сығарырға