Белеме яғынан ғына түгел, өл­гөлө тәртибе, тормошҡа ҡара­шы менән дә маҡтауға лайыҡ улар. Сер түгел, интернатта тәрбиә эше­нә иғтибар юғары. Хәйер, тәртип юҡ икән, уҡыуҙың да алға барыуы икеле.
– Әлеге заманда шәхес тәр­биәләү еңелдән түгел. Нисек кенә булмаһын, балаларҙың холоҡ-фиғеле формалашыуы көнүҙәк тема булып ҡала, нәҡ ошо принциптан сығып эш итәбеҙ. Мәғлүм булыуынса, беҙҙә малайҙар ғына уҡый. Шуға ҡарамаҫтан, бер-береһен кәмһетеү-рәнйетеү һы­маҡ күренештәр юҡ, сөнки бөтәһе лә коллектив булыуҙарын тойоп йәшәй, юғары класс уҡыусылары “ҡустылары” өсөн яуаплы, — ти Башҡортостан мәғарифы отличнигы, ди­ректорҙың тәрбиә эштәре буйынса урынбаҫары Розалия Хәкимова.
Әйткәндәй, Розалия Вәли ҡыҙы белем усағында асылған көндән алып уҡыта. Әлбиттә, тәртип булдырыу бер уҡытыусы иңендә генә түгел, интернатта тиҫтәнән ашыу тәрбиәсе эшләй. Тыуған йорттарынан ситтә белем алған үҫ­мер­ҙәргә икенсе әсәй һымаҡ йы­уа­тыусы ла, кәңәшсе лә хәстәрлекле һәм яғымлы апайҙар. Дәрестәре тамамланғандан алып йоҡларға ятҡанға тиклем уҡыусылары янында улар.
— Тәрбиә эшендә киң мәғлүмәт сараларын ҡулланыу отошло. Баш­ҡорт интеллигенцияһының киләсәген тәрбиәләүсе булараҡ, айырыуса милли баҫмаларҙы йыш ҡулланабыҙ. Мәҫәлән, “Баш­ҡортостан” гәзитен класс менән уҡыйбыҙ: яңы­лыҡтар, республика­лағы хәлдәр менән танышабыҙ, — ти тәрбиәселәр. Әйткәндәй, улар “Башҡортостан” гәзитенә йылдың-йылы ихлас яҙыла.
Милләтебеҙ киләсәген аңлап эш иткән был мөләйем ҡатын-ҡыҙға “Афарин!” тиеүҙән башҡа һүҙ юҡ.