Нурия ЕЙӘНҒОЛОВА.
Баймаҡ ҡалаһы.


Башҡортостан мосолмандарының Диниә назараты рәйесе мөфтөй Нурмөхәмәт хәҙрәт НИҒМӘТУЛЛИН:
Бисмилләһир-рахмәнир-рахим!
Хөрмәтле мосолман ҡәрҙәштәр, ба­ры­ғыҙҙы ла изге Ураҙала ихлас тәб­рикләйем. Рамаҙан шәриф айы­быҙ мө­бә­рәк булһын, Ал­лаһ Тәғәлә до­ға­ла­ры­быҙ­ҙы, күркәм ғә­мәлдәребеҙҙе ҡабул итһен, именлек, бәрә­кәт насип ҡылһын!
Пәйғәмбәребеҙ Мөхәммәт ғәләйһис-сәләм үҙенең мөбәрәк хәҙисендә Исламдың биш терәккә таянғаны хаҡында әйткән. Бында бөйөк хикмәт бар. Ысынлап та, терәк берәү генә икән, ул тотанаҡһыҙ була, икәүгә лә ышаныс аҙ. Ә инде бишәүгә ныҡлы таянырға мөмкин. Быны хатта ки әҙәм балаһының ҡул-аяҡ бармаҡтары һаны ла иҫбатлап тора.
Пәйғәмбәребеҙ биш терәк хаҡында айырым бәйән иткән. Уларҙың беренсеһе – иман (Аллаһ Тәғәләнең барлығын һәм берлеген таныу), артабан намаҙ, ураҙа, хаж, зәҡәт килә. Үткән вәғәздәремдең береһендә әйтеп уҙғанымса, Раббыбыҙ бер сәхәбиҙе Йәмәнгә ебәргәндә: “Барғас, иң тәүҙә Аллаһтың берлегенә саҡыр”, – тигән. Ләкин ваҡытын ҡуймаған: бер аймы, икеме, йыл­мы, әллә унан да оҙағыраҡмы – билдәһеҙ. Иманды ҡабул ҡылһалар, намаҙға саҡы­рырға ҡушҡан. Артабан – башҡаларына. Тимәк, тормоштағы башҡа күренештәр кеүек үк, дингә саҡырғанда ла баҫҡыстар буйлап күтәрелергә әйҙәгән, тиҙлек, илке-һалҡылыҡ менән һөҙөмтәгә өлгәшеп булмаҫын аңғартҡан.
Ошоға бәйле Нурия ҡәрҙәштең борсо­лоу­ына түбәндәгесә яуап бирер инем: ашыҡ­майыҡ, сабыр ғына алға барыуҙы дауам итәйек. Нисәмә быуын Исламдан, уның ғәмәлдәрен үтәүҙән мәхрүм булып үҫте, намаҙ уҡый белгәндәр иһә баш­ҡаларҙы өйрәтеүҙән ҡурҡты. Дини китап­тарҙы юҡҡа сығарыу осраҡтары булғаны ла мәғлүм. Шуның өсөн, “Ҡөрьән Кәрим” өйрәткәнсә, Аллаһ Тәғәлә юлына хикмәт һәм күркәм вәғәз менән саҡырырға те­йешбеҙ. Халҡы­быҙ Исламдың рухи ҡим­мәттәрен әкренләп өйрәнһә, күңелендә уға ҡарата хөрмәт, һөйөү тойғоһо уянһа, динебеҙҙең әҙәм бала­һына биргән иҫәпһеҙ-хисапһыҙ ниғ­мәтен аңлаһа, намаҙ уҡый башларға ла оҙаҡ ҡалмаҫ. Ә бының өсөн иң тәүҙә беҙ иман тәрбиәләргә тейешбеҙ. Изгелеккә, әҙәп-әхлаҡҡа, рухҡа табан әкренләп булһа ла юл алғанбыҙ икән, иншаллаһ, Раббыбыҙ бәрәкәтен бирер. Иманға килһәк, телебеҙ ҙә, милләтебеҙ ҙә, ғөрөф-ғәҙәтебеҙ ҙә, еребеҙ ҙә имен булыр.
“Аллаһ Тәғәләнең рәхмәтенән өмөтө­гөҙҙө өҙмәгеҙ”, – тиелгән изге “Ҡөрьән”дә. Ошо һүҙҙәрҙе онотмайыҡ, хөрмәтле ҡәр­ҙәштәр. Әле дингә табан тәүге аҙымдарын атлаған халҡыбыҙ бер заман ныҡлап иманға килер, Исламдың бәрәкәтендә, татыулыҡта, тыныслыҡта, изгелек-игелектә ғүмер итер. Һөҙөмтәлә күмәк намаҙҙар ҙа уҡылыр, иншаллаһ. Әс-сәләмү-ғәләйкүм үә рәхмәтул-лаһи үә бәрәкәтүһ! Амин.