Яҡты теләктәр, изге маҡ­сат, күтәренке күңел менән башланды сәфәр. Алыҫ ара­ларҙы яҡынайтып, Ҡазанға тиҙ үк барып еттек. Ҡала беҙ­ҙе үҙенең ма­турлығы менән ихлас сәләмләп ҡаршы алды.
Ҡунаҡханаға урынлаштыҡ та экскур­сияға юлландыҡ. Беренсе сәйәхәтебеҙ – Кремлгә. Уның алдындағы майҙан тирә­ләй боронғо архитектуралы йорттар урын­лашҡан. Шунда уҡ — сувенир киосктары. Ҡол-Шәриф мәсете, Сөйөмбикә манараһы, Кремлде төҙөү­се­ләргә һәйкәл... Сувенирҙарға килгәндә, ниндәйе кәрәкһә, барыһы ла бар. Сигелгән түбәтәй, сәк-сәк – былары инде Ҡазан менән Татар­стан­дың милли бренды бейеклеге­нә ҡуйылған! Кремлде һоҡ­­­ла­нып ҡарап сығыуға, төш етте, тимәк, тамаҡ ялғарға ваҡыт. Бауман урамына тө­шөп, “Сәй йорто”на индек тә ҡапҡылап сыҡтыҡ. Бик ҡый­бат­ҡа төштө, ләкин тәмле итеп ашап алыуға бер кем дә ҡаршы түгел ине. Ҡала урамдары буйлап сәйәхәт ҡылғас, паркка юлландыҡ. Әлеге көндә ул “Ҡырлай” тип атала.
Ҡабан күле буйында бу­лып, Ғәлиәскәр Камал исе­мен­дәге театр эргәһендә “бе­йеп торған” фонтандарҙы күреп, һоҡланып туя алманыҡ.
Кискеһен ҡайтҡас, бүлмә тәҙрәһенән иҫ киткес тамаша ҡаршы алды – төрлө уттар менән янып-балҡып, Кремль күре­нә. “Мең дә бер кисә”нән бер күренеш тиерһең! Ҡол-Шәрифтең сихри уттарына бағып, бер мәлгә тын ҡалдыҡ. Ә моңло аҙан тауышы күңелде иркәләй. Ҡайҙа ул ир­тәнгә тиклем түҙеү – төнгө ҡала урамдарын гиҙергә сы­ғып киттек. Эргә­лә заманса тормош ҡайнай, ә Кремль мөһа­­бәт һәм ғорур көйө тын ғына бейектән ҡала ығы-зығыһын күҙәтә.
Ҡазан Мәскәү ваҡыты ме­нән йәшәй, шуға иртәгәһен көн тәртибе беҙҙең өсөн ашыҡмай ғына башланды. Тороп, тамаҡ ялғап алғас, экскурсия автобусында сәфәр­гә юлландыҡ. Өс сәғәт эсендә гид оҙатыуында Ҡазан ҡалаһының ­үткәнен һәм бөгөнгөһөн асыҡ сырамы­тырлыҡ иҫтәлекле урын­дар менән таныштыҡ.
Экскурсоводтың киң эрудициялы булыуы мотлаҡ: был — уның һөнәри үҙен­сәлеге. Был йәһәттән гидыбыҙ Оксана Ғәлибаева төплө белгес булыуы менән беҙҙе арбаны. Уның ябай­лығы, тормошсан, еңелсә юмор менән һөйләүе беҙҙең күңелдәрҙә яҡты хис­тәр уят­ты. Артабанғы экскурсия Та­тар­стандың Милли му­зе­йын­да булды. Ике ҡатты йөрөп сығып, татар халҡының боронғо тормошона күҙ һал­дыҡ. Иң ныҡ һоҡ­лан­дырған һәм иҫтәлекле экспонат­тар­ҙың береһе Екатерина II бат­ша­бикә­нең экипаж каретаһы булды.
Тәьҫораттарыбыҙ бихисап. “Юл аҙабы – гүр ғазабы” тигәнгә ҡарамай, бөтә нәмә уңай килеп торҙо. Ошоноң менән экскурсия бөттө тип уйламағыҙ, алда беҙҙе тағы ла шатландырырлыҡ урын ҡаршы алды. Ул – “Ривьера” аквапаркы! Дүрт сәғәт ваҡыт эсендә рәхәтләнеп ял иттек.
Ғөмүмән, Ҡазан ҡалаһы беҙҙең күңелдә матур хис-тойғолар ғына ҡалдырҙы.