“Мәктәптәрҙе ҡулайлаштырыу дауам итә. Беҙгә, уҡытыусыларға, ҡайҙан эш табырға?” – тип борсолоуын белдергәйне Башҡортос­тандың көньяҡ-көнсығышында йәшәгән авторыбыҙ гәзиттең быйылғы 23 май һанында. Уға республиканың Мәғариф ми­нистр­лығынан яуап хаты килде.

Яҙмала әйтелеүенсә, район һәм ҡала хакимиәттәренең рәсми сайттарында белем биреү учреж­дение­ларындағы вакансиялар хаҡында мәғлүмәт бирелә бара. Урындағы үҙидара органдары тарафынан педагогка башҡа уҡыу йортонда эш табыу, тар­маҡта ихтыяж кисерелгән башҡа специальностар буйынса курстар үтеү йәһәтенән ярҙам ойошторола.
“Былтыр ҡыҫҡартылған уҡы­тыусыларҙың 25 проценты бүтән мәғариф учреждениеларына күсеү юлы менән эш тапты, күптәре белемен камиллаштырыу мөмкин­леген алды”, – тиелгән хатта.

Сентябрҙе көтөргә ҡала

Гәзитебеҙҙең быйылғы 13 июнь һанында Ғафури районынан Флүрә Хәлилованың юл мәсьә­ләһе хаҡында яҙмаһы донъя күргәйне.
“Баш ҡалаға беҙ, ғафуриҙар, Архангел районы аша йөрөйбөҙ, – тип хәбәр иткәйне мәҡәлә авторы. – Ләкин тиҫтә йылдар буйы ике район араһындағы юлға иғтибар булманы. Биш саҡрымлыҡ араға асфальт түшәмәй яфаланылар. Ниһайәт, былтыр көҙ эш башланды. Эй шатланғайныҡ, тик ни ғиллә: тап ике район сигендә 700 метр самаһы араға асфальт етмәй ҡалған...”
Белдерелгән дәғүәгә Башҡор­т­остандың Транспорт һәм юл хужалығы буйынса дәүләт комитетынан яуап хаты алдыҡ.
“IV техник категорияға ҡараған муниципаль-ара әһәмиәттәге юлдың 15,3 – 20,03 саҡрымлыҡ участкаһын үҙ эсенә алған “Архангел – Красноусол” автомобиль юлы Башҡортостандың Юл хужалығы идаралығы ҡарамағына инә, – тиелгән унда. – Законға ярашлы тәртиптә подрядсы ойошманы һайлау йәһәтенән тендер ойошторолоп, “Башкиравтодор” йәм­ғиәте еңеүсе тип табылды. Уның менән Башҡортостандың Юл хужалығы идаралығы ара­һында капиталь ремонт яһау, атап әйткәндә, ҡырсынташты асфальтлы бетонға алмаштырыу буйынса дәүләт контракты төҙөлдө.
Был документтың шарттарына һәм бүленгән лимитҡа ярашлы 2012 йылда әҙерлек эштәре башҡарылды. Былтыр иһә “Архангел – Красноусол” юлының 15,3 – 17,3 саҡрымлыҡ участкаһы асфальтланды. Быйыл эш дауам итә, контрактҡа ярашлы сен­тябр­ҙә тамамланырға тейеш”.

Әлегә исемһеҙ урам юҡ

“Шағир рухы изге эштәргә әйҙәй” тигән мәҡәләлә (16 май, 2014 йыл) Өфөлә Рәшит Наза­ровтың исемен йөрөткән урам юҡлығы хаҡында әйтелгәйне. Быға баш ҡала хакимиәтенән шундай яуап бирҙеләр:
“Әлегә Өфөлә исем бирел­мәгән урам юҡ. Күтәрелгән мәсьә­лә иғтибарға алынды”.