Минеңсә, ауылдарҙы бөлөүҙән һәм бөтөүҙән һаҡлап ҡалыуҙың бер сараһы – ауыл байрамдарын уҙғарыу. Үткән быуат аҙаҡтарында Әбйәлил тарафтарында баш­ланғыс алған «Һаумыһығыҙ, ауылдаш­тар!», яңы быуатта тамырланып киткән шәжәрә байрамдары кесе ватаныбыҙҙы һаҡлап-яҡлап алып ҡалыуҙа бик ҙур әһәмиәткә эйә. Бын­дай сараларҙы һәр ҡайҙа ойош­торорға кәрәк.
Ғафури районында ла ауыл байрамдары даими уҙғарылып тора. Ситтә йәшәгән яҡташтар ярҙа­мын­да ойошторолған бындай байрам­дарҙан һуң ауылдар тө­ҙөк­лән­дерелеп, күркәмләнеп, ә урындағы халыҡ рухланып ҡала.
19 июлдә (сәғәт 12-лә) «Һаумыһығыҙ, ауылдаштар!» байрамын районыбыҙҙың кескәй генә Яҡтыкүл ауылы үткәрәсәк. Архангел районы сигендә урынлашҡан был ауыл хәҙер икенсе йәшлеген кисерә тиһәк тә хата булмаҫ. Танылған халыҡ сәсәне Вәлиулла Ҡоломбәтов, Башҡортостан Арбитраж судының элекке рәйесе Әсҡәт Шәмсетдинов һәм башҡа билдәле шәхестәр тыуып үҫкән бай тарихлы ауылым үҙ балаларын ҡунаҡҡа көтә. Рәхим итегеҙ тыуып үҫкән ерегеҙгә, ҡәҙерле ауылдаштар, ҡан-ҡәрҙәштәр!

Ғаяз ӘМИНЕВ,
мәғариф ветераны.