Класташтар менән ҡабаттан осрашыу, аралашыу, барлыҡ сығарылыш уҡыусыларының үҙ-ара танышыуы маҡсатында ойошторолған сараға 200-ҙән ашыу кеше килде. Шулай уҡ уҡытыусы-ветерандар саҡырылды.
Интернатты 1985 йылда тамамла­ған, әлеге көндә “Беренсе” ассоциация­һын етәкләгән Рәүфә Рәхимова бай­рам­ды асып, ойошманың барлыҡҡа килеү тарихы, уның маҡсаттары хаҡында һөйләне.
– “Беренсе”ләр һәр ерҙә лә беренсе булырға тейеш! – тине ул.
Гимназия-интернат директоры Әлфир Ғайсин уҡыу йортоноң бөгөнгө эшмәкәрлеге, ҡаҙаныштары тураһында һөйләне. Тәрбиәсе-ветеран, Башҡорт­остандың атҡаҙанған уҡытыусыһы Фәриҙә Бәхти­йәрова улар өсөн һәр быуын балаларының ҡәҙерле булыуын билдәләһә, Рәсәйҙең халыҡ мәғарифы отличнигы, Башҡортостандың атҡаҙанған уҡытыусыһы Фәүзәнә Аҡманова әле республика интеллигенция­һының күпселек өлөшөн тәшкил иткән үҙенең уҡыусылары менән ғорурланыуын белдерҙе.
Сығарылыш уҡыусылары исеменән интернатты 1957 йылда тамамлаған Альбина менән Фәнис Исхаҡовтар, Салауат Килдин сығыш яһаны. Улар барлыҡ уҡытыусыларға, тәрбиәселәргә рәхмәт әйтте һәм Ассоциация ойоштороуҙың изге баш­ланғыс булыуын билдәләне.
Артабан байрамда ҡатнашыусылар төрлө уйындарҙа, бәйгеләрҙә көс һынашты. Еңеүселәргә почет грамоталары, бүләктәр тапшырылды. Ойоштороусылар һәм бағыусылар рәхмәт хаттары менән билдәләнде. Көн дауамында сәхнәлә республиканың билдәле һәм йәш йырсылары, Ф. Ғәс­кәров исемен­дәге дәүләт академия халыҡ бейеүҙәре ансамбле ҡатнаш­лығында концерт барҙы.
Сара күңелле дискотека һәм фейерверк менән тамамланды. Барыһы ла байрамдан ҡәнәғәт ҡалды, күңел асып, ял итеп, киләһе йылда тағы ла осрашырға вәғәҙәләшеп таралышты.