Бөтә донъя башҡорттары ҡорол­тайының Башҡарма комитетынан Рәйсә Ғәйфуллина менән көн һайын тигәндәй бәйләнештә бул­дыҡ. Ул быға тиклем референдумға әҙер­лән­гән­дә лә, аҙаҡтан да йылы һүҙ, кәңәш­тәре менән беҙҙе алға әйҙәп, ҡанатландырып торҙо.
12 июндә Симферополдә бөтә Ҡырым һабантуйын үткәреү тура­һында иғлан ителде. Беҙ, унда барып, концерт ҡуйҙыҡ та, яҡташта­рыбыҙ янына — Белогорск ҡала­һына — юл алдыҡ.
Майҙанда йәш таланттар, күбә­ләктәй осоп, башҡорт, урыҫ, ҡырым татарҙары бейеүҙәрен башҡарҙы. Башҡортостандан «Далан» төркө­мөнөң килеүе бик тә шатландырҙы. Уның етәксеһе Артур Туктағоловты осратып, беҙгә йышыраҡ килеп тороуҙарын һора­ныҡ.
Белогорск халҡы, Башҡортостан Хөкүмәтенә рәх­мә­тен белдерҙе. Бындай байрамды ғүмер­ҙә күргәнебеҙ булманы, тиҙәр. Беҙ милли кейемдә йөрөгәс, туҡтатып, һеҙ башҡорт­тармы, тип тә һорайҙар. Ике ҡатын килеп, күҙ йәштәре аша рәхмәт әйтте. Ирҙәре Афған һуғышы ветерандары уларҙың. “9 майҙа беҙ­гә байрам бүләге тапшырҙылар, башҡорт балы тураһында ишетеп кенә белә инек, бына тәмләп ҡа­раныҡ”, — тиҙәр. Башҡортостандан килгән гумани­тар ярҙам һуғыш ветерандарына, күп балалы ғаилә­ләргә, оло йәштәге пенсионерҙарға таратылды.
Яҡташтарыбыҙ бейәләр алып килгән, ҡымыҙ менән һыйланылар. Йылҡы ҡараусылар, комбайнсы егет­тәр менән дә осраштыҡ. Әле Белогорск районы баҫыуҙарын­да Баш­­ҡорт­остан­дың 15 ком­байны арпа, арыш ура. Ергән, Баймаҡ, Миәкә яҡта­рынан кил­гән комбайнсылар беҙҙең йәштәр менән тәжрибәһен уртаҡлашты.
Ҡурайҙа уйнап, йырлашып та алдыҡ, үҙем яҙған шиғырҙарҙы ла уҡып ишеттерҙем. Башҡорт рухлы кеше икәнһең, ағай, тип маҡтап та алдылар үҙемде.
Башҡортостандан килгән төҙөү­селәр мәктәпте, балалар баҡсаһын ремонтлай. 2 – 7 июндә Өфөнөң күҙ ауырыуҙары ғилми-тикшеренеү институты белгестәре, кардиолог­тар килеп, халыҡты ҡабул итте.
Башҡортостандың Ҡырымға ҡа­рата мөнәсәбәте ысын дуҫлыҡ тойғоһо менән һуғарылған. Артабан да бәйләнештәр ихлас дауам итһен, беҙҙең яҡташтар Ҡырым шифаханаларында һаулығын нығытып, донъя күреп ҡайтһын, тип теләйем.