Яҡташым Фуат Толомбаев хаҡында шулай тип әйтеп булыр ине. Белеүебеҙсә, “егәрле” һүҙе кешенең уңғанлығын, алтын ҡуллы булыуын, бар эште теүәл башҡарыуын билдәләй.


Фуат Фәтҡулла улын яҡта­шым тип иҫәпләүем шунан: уның тыуған ауылы Үрге Бик­бирҙелә Мөфиҙә апайым ме­нән Нәбиулла еҙнәм ут күрше булып йәшәне. Барғанда йыш ҡына Фуат менән бергә уйнарға, бал ҡорто күсен ауларға тура килгеләне. Үҫмер ҡорона ингәс, һәр кем үҙ яҙмышына тәғәйен юлдан атлағандыр. Тик тау менән тау ғына осрашмай, тиҙәр. Башҡорт­ос­тан­дың мәғарифты үҫте­реү институтында эшләгән дәүерҙә республика кимәлен­дәге умартасылар бәйге­һен­дә осраштыҡ.
Беҙ уның менән ауылдарҙы һаҡлауҙа тәүге сараларҙың береһе булараҡ умар­тасылыҡты үҫтереүҙе күрҙек. Мәктәп уҡыусыларына уны предмет рәүешендә өйрәтеүҙең әһәмиәте хаҡында һөйләш­тек. Уйы­быҙҙы ҡеүәт­ләгәндәй, ниһайәт, боҙ урынынан ҡуҙғалды: көньяҡ-көнсы­ғыш һәм төньяҡ-көнсығыш район­дарҙың иҡтисади үҫеш про­г­­­рам­ма­һына ярашлы, умар­тасылыҡ фән булараҡ ҡайһы бер мәк­тәптәрҙә уҡытыла башланы.
Фуат Толомбаев – райондың умар­тасы­лар ассоциацияһы рәйесе лә, Баш­ҡортостан умартасылыҡ һәм апитерапия буйынса ғилми-тикшеренеү үҙә­ге­нең “Ейәнсура” фәнни-тәжрибә стан­цияһы етәксеһе лә. Станция ҡа­рамағындағы Саҙалы, Байдәүләт, Бикҡужа, Буранғол, Үрген ауылдарында урынлашҡан умар­талыҡтарҙың эше көйлө бара. Тынғыһыҙ умартасы ҡышын да тик тормай: нәҙе­кәйбилдәрҙең хәлен белеп, кәрәк саҡта уларға ярҙам итеүҙе лә хәстәрләй, киләһе йыл уңы­шы өсөн умарталарҙы һәм рам­дарҙы төҙәтеп, яңыларын яһай. Әйт­кәндәй, Фуат Фәт­ҡулла улы яратҡан баҫмаһының тиражын арттырыуға үҙ өлөшөн индерҙе – һигеҙ хеҙмәткәренә “Башҡортостан” гәзитен яҙҙырҙы.