...Ҡаланың яңы биҫтәһендә һалына баш­лаған йорт янын­дағы майҙансыҡта әүәлгенән айырылып торған эшлекле йән­лелек. Хужаларҙан тыш, Бәлә­бәй, Бөрө, Октябрьский, Өфө, Салауат, Стәр­ле­тамаҡ һәм Туймазы ҡалаларынан кил­гән ил­легә яҡын ташсы оҫталыҡҡа һынау тотор алдынан остаздарынан һуңғы күр­һәтмә ала. Бер нисә гүзәл заттан башҡа­ла­ры – төрлө йәш­тәге ир-егеттәр. Уларҙы бер­ләштергән си­фат – эште яратып баш­ҡарыу, бай тәжрибә һәм, әлбиттә, һөнәри оҫталыҡ.
Ярыш урынында барыһы ла әҙер. Тиҙ­ҙән стена булып ҡалҡасаҡ кирбес ма­тур рәттәргә өйөлөп ҡуйылған, иҙел­мә кил­терелгән. Махсус эш кейеме һәм ҡыҙ­ғылт һары төҫтәге каска кейгән ташсылар, тәғәйен­ләнгән урындарына баҫып, үҙ ҡорал­дарын барлап бөтөүгә ярышҡа старт бирелде. Икешәр кешенән тор­ған егерме өс звено алышты башланы. Артабан ике сәғәт ярым эсендә оҫталарҙың мастерок менән кирбескә һуғып алыуы, ара-тирә үҙ-ара бер ни­сә һүҙ менән аралашыуы ғына ишетелеп торҙо. Барыһы ла тырышты. Эшкә баһа биргән­дә кир­бес­тәр ара­һындағы иҙмә­нең ҡалынлығы, стенаның ти­геҙ­­­леге һәм башҡа күп күр­һәт­кестәр иҫәпкә алын­ды. Тео­ре­тик әҙер­лекте лә тик­шергәндән һуң, конкурс йом­­ғаҡ­тары иғлан ител­де.
Республиканың иң яҡшы таш­сылары булып Ринат Ғи­лем­ханов менән Сергей Митрофанов танылды. Улар – “Неф­те­камск­стройзаказчик” муниципаль төҙө­лөш пред­приятиеһы вәкилдәре. Был оҫ­та­лар алда Волга буйы федераль окру­гы кимә­лендә республика данын яҡлаясаҡ.
Туймазының 3-сө төҙөлөш фирмаһы­нан Айҙар Зыятдинов менән Динар Миң­лейә­ров – икенсе, “Башгражданстрой” тресы оҫта­лары Вадим Шәрә­фетдинов менән Сергей Пиксаев звеноһы өсөнсө урынға лайыҡ булды. Еңеүселәр ҡим­мәт­ле бүләк һәм диплом, ҡал­ған бәйгеселәр иҫтәлекле приз һәм рәхмәт хаттары алды.
Ойоштороусылар билдә­лә­үен­сә, бындай ярыштар ҡатна­шыусы­ларҙың ғына түгел, һәр пред­приятиеның артабанғы үҫеше өсөн дә ныҡлы дәртләндереү бу­лып тора, етәкселәрҙе хеҙмәт етештереү­сәнле­ген һәм эштең сифатын күтәреү буйынса даими хәстәрлек күрергә мәжбүр итә.