Республика етәксе­леге уҡыусы балалар­ҙың йәйге ялын ойош­­тороуға ҙур иғти­бар бирә, Мәғариф ми­нис­тр­лығы был тәң­­гәл­дә айырыуса оло хәс­тәрлек күрә. Мәҫә­лән, быйыл йәш­­тәр­ҙең, үҫмер­ҙәрҙең һәм ба­ла­ларҙың ялын ойош­тороу һәм улар­ҙың һаулығын нығы­тыу маҡсатында төр­­лө йүнәлештәге 2 832 лагерь үҙ ишек­тәрен асты. Хәйер, тәүге смена күптән түгел тамамланды, сираттағыһының асылыуы көтөлә.
Башҡортостандың мәғариф министры урынбаҫары Венера Вәлиева билдәләүенсә, быйыл малай һәм ҡыҙҙарҙың ялын ойоштороу бүтән йылдарҙағынан профилле сменаға өҫтөнлөк бирелеүе менән айырыла. Һәр бала үҙенсәлекле: әйтәйек, кемдер теүәл фәндәрҙе ярата, икенселәр гуманитар йүнәлеште һайлаған, бүтәндәр иһә сәнғәтте үҙ итә йәки спорт менән дуҫ.
Республикабыҙҙың 42 муниципаль берәмеге профилле сменала ҡатнашыусыларҙы ҡабул итеп алды, бөгөн 50 стационар һа­уыҡ­тырыу лагеры балаларға онотолмаҫ ял бүләк итә. Уларҙа йәмғеһе 5 меңдән ашыу ҡыҙ һәм малай һаулығын нығытыр тип күҙаллана. Хәҙер иһә “Красноусол” шифахана-һауыҡтырыу лагерының “Йәйләү” програм­маһы нигеҙендә эшләүе, шулай уҡ ҡала янындағы “Зарница” лагерына теүәл фәндәрҙән яҡшы өлгәшкәндәрҙең урынлашыуы – шуға асыҡ миҫал.
Башҡортостандың тарихын һәм мәҙәниәтен өйрәнеү буйынса лагерь (һәләтле балалар өсөн) йыл һайын ойошторола. Әйткәндәй, ял өсөн ата-әсә кеҫәһенән бер тин дә түләмәй. Уға башланғысты яҙыусы һәм ғалимә Мәрйәм Бураҡаеваның һалыуын күптәр белә. Әлегәсә ул Стәрлебаш (“Орленок” лагеры), Ейәнсура (“Аҡ елкән”), Ғафури (“Имәнкәй”) райондарында һәм Күмертау (“Йәшел имән”) ҡалаһында ойошторолдо. Быйыл ул Бәләбәй районында үтәсәк. Әйткәндәй, бөгөн балалар ял итергә юлланды.
Өс аҙна “һә” тигәнсе үтә лә китә. Етәкселек һәм пионер­вожатыйҙар был көндәр һәр баланың хәтерендә оҙаҡ һаҡланһын тигән изге маҡсатты күҙ уңында тота. Белем туплау, ваҡытты дөрөҫ файҙаланырға өйрәнеү һәм, әлбиттә, һаулыҡты нығытыу, көс йыйыу өсөн барлыҡ уңайлы шарттар тыуҙырылған. Үҫмерҙәр сәнғәт һәм мәҙәниәт әһелдәренең сығышын ҡарай, үҙҙәре лә йырлай, бейей, ижади кисәләргә йөрөй, өҫтәүенә шул төбәктең тарихи урындарына сәфәр ҡыла, шулай уҡ башҡа күп төрлө тәрбиәүи сараларҙа ҡатнаша.