Иҫке Күктау халҡы изге эште үҙе башланы: бер йыл элек тап ошо ва­ҡытта ауылдаштар бергәләп иҫке мәсет ихатаһында өмә үткәреп, яңыһына нигеҙ һалды. Төп ниәт, әлбиттә, ди­небеҙҙе үҫтереү, йәштәр күңелендә әхлаҡ, иман тәрбиәләү, эскелекте бөтөрөү, кешеләрҙе дуҫ, татыу йәшәргә өндәү ине.
Тантананы район хакимиәте баш­лығы Илдар Мостафин асты. Ауыл халҡына изге теләген шулай уҡ Юғары мөфтөй, Рәсәй мосол­ман­дарының Үҙәк диниә назараты рәйесе Тәлғәт Тажетдин, респуб­ликаның ауыл хужалығы министры урынбаҫары Ф.Р. Шәйхетдинов, Иҫке Күктау ауыл Советы хакимиәте башлығы Р.М. Мөбәрәков, Илеш, Баҡалы райондарының имам-ахуны Рөстәм хәҙрәт Абушахмин, Баш­ҡорт­остандың халыҡ яҙыусыһы, яҡташыбыҙ Суфиян Поварисов, “Урожай” хужалығы етәкселәре еткерҙе.
Тарихҡа килгәндә, Бөйөк Ватан һу­ғышы осоронда, 1944 йылдың яҙында, баҫыуҙа көҙҙән ятып ҡалған башаҡ­тарҙы йыйып ашап, ауыл халҡы күпләп ағыуланған. Һанаулы көндәр эсендә уларҙың яртыһы һәләк булған, ҡай­һылары тотош ғаиләһе менән үлгән. Ошо ҡорбандарҙың рухына бағышлап, таҡтаташ асылды.
Тантаналы сара шундай һүҙҙәр менән тамамланды:
“Изгелекле милләтемдең
Күңел күктәрен яҡтырт!
Көлөп торһон киләсәктә
Һәр бер ғаилә, һәр бер йорт!”
Унан, ҡорбан салынып, аш әҙер­ләнде.
Иҫке Күктау – Илештә иң төҙөк, матур ауылдарҙың береһе. Халҡы тырышлығы, уңғанлығы менән айырылып тора. Манараһы күккә олғашҡан, ихатаһы сәскәгә күмелгән, ҡоймалары әкиәт илен хәтерләткән иман йорто был күркәмлекте тағы ла арттырҙы. Барлыҡ ауыл халҡының, эшҡыуарҙарҙың, ситтә йәшәгән яҡташтарҙың күңел йылыһы һалынған бит уға!



Раушания СӘХӘҮЕТДИНОВА, эшҡыуар:
– Ауылымда – тарихи мәл. Ошондай күркәм мәсет асылыуына ифрат шатмын. Тыуған ауылымдың яҡты киләсәгенә ышанысым ҙур.

Әлмир МӨХӘРЛӘМОВ, Өфө ҡалаһы:
– Студент сағымда уҡ мәсеткә барып хәйер һала торғайным. Хәҙер тыуған төйәгемдә лә ошондай рух мөйөшө асылды. Иман йортона инеп, хәйер биреү, доға ҡылыу, юлға фатиха алыу һәр ауылдашымдың тормошона бәрәкәт бирер, иншаллаһ.