Оло улым хәл өҫтөндә ятҡан, мин дауаханала булған саҡта, 7 ноябрҙә, дүрт баламды приютҡа алып киттеләр. Улар бер ҡасан да ас ултырманы, ҡараулы булды, үҙем гелән гөрләтеп баҡса үҫтерҙем. Тәүҙә эсә инем, хәҙер был ҡылыҡты ташланым. Бәләкәс­тәрем приюттан илап шылтырата. Уларҙы уйлап, төндәрен йоҡлай алмайым. Ҡайтанан юллап ҡараным – балаларҙы бирмәйҙәр.

Гөлнара Хәмитова.
Бөрйән районы, Ғәлиәкбәр ауылы.

* * *

Башҡортостандағы шишмәләрҙең торошо борсой. Йәй ҡоро килеү сәбәпле, уларҙы һаҡ­лау буйынса 22 июндән 1 сентябргә тиклем “Тере һыу” акцияһын үткәрергә тәҡдим итәм. Шишмәләрҙе, уларҙың тирә-яғын сүп-сарҙан таҙартырға, һыу буйында автомобиль йы­уыу­ҙы тыйырға һәм башҡа саралар күрергә кәрәк. Үҙебеҙҙәге Ерекле шишмәһен йыл да таҙартам. Һыу – йәшәү сығанағы, уны һаҡ­лайыҡ!
Владик Ҡыҙрасов.
Күгәрсен районы, Аҙнағол ауылы.

* * *

Еҙем-Ҡаран ауылында “Ашығыс ярҙам” хеҙмәте эшләй ине. Өс кеше 20 ауылды хеҙ­мәтләндерҙе. Хәҙер ауыл халҡы аптырашта ҡалды – ни өсөн уны яптылар?

Флүрә ХӘЛИЛОВА.
Ғафури районы.

* * *

Белорет районының Ғәбдөк ауылында юлдар бик насар хәлдә, электр бағаналары сереп бөткән, шулай уҡ һыу мәсьәләһе киҫ­кен тора. Ауылға колонка кәрәк. Өҫтәүенә кеҫә телефоны элемтә сигналдарын тотмай, ә стационар телефон ҡыйбатҡа төшә.

Әүхәҙи Йосопов.

* * *

Ауылды һыу баҫҡандан һуң юлдар ипкә килтерелмәне, бик насар хәлдә. “Ашығыс ярҙам” саҡыртһаҡ, килмәйҙәр, һеҙгә үтеп бул­май, тиҙәр. Аҙыҡ-түлек, төҙөлөш материалдары ла алып килергә мөмкинлек юҡ.

Нурил Йосопов.
Белорет районы, Ғәбдөк ауылы.