60 йыл татыу ғүмер иткән Мәрүәрә Мансур ҡыҙы менән Миңләхмәт Ғө­бәйҙулла улы Ғайсиндарға (беренсе рәттә), ярты быуат иңгә-иң терәп ғүмер һөргән Фатима Ғосан ҡыҙы һәм Әмир Шакирйән улы Әхмәт­йәнов­тар­ға күҙ һалығыҙ әле! Һоҡла­нып туй­маҫлыҡ үҙҙәренә! Бына ҡайҙа ул ысын мөхәббәт өлгөһө! Бына кем­дәрҙән өйрәнергә кәрәк тормош һабағына!
Йәмле йәй көндәренең береһендә ҡала хакимиәте һәм ЗАГС бүлеге хеҙмәткәрҙәре ошондай матур ғаилә парҙарын тантанаға йыйҙы. Юбиляр­ҙарҙы Стәрлетамаҡ ҡалаһы хакимиә­те­нең эштәр идарасыһы Рөстәм Мө­шә­­рәпов, ҡала Советы депутаты Светлана Ковальская, мәҙәниәт һарайынан һәүәҫкәр артистар, балалары, туғандары ҡотланы.
– Туйҙар үткәреп өйләнешергә тура килмәне беҙгә. Ћуғыштан һуңғы ауыр йылдар ине. Аллаға шөкөр, бына ярты быуат инде аңлашып, татыу донъя көтәбеҙ. Шуға күрә ауырлыҡтарға ла бирешмәнек, – тип бер-береһенә ҡарашып йылмайыш­ты Рима Ғәли ҡыҙы менән Зөфәр Зәки улы Мирхәйҙәровтар.
Бер миллион һумға туй үткәреп, бер ай ҙа йәшәй алмаған хәҙерге ҡайһы бер йәштәргә был һүҙҙәрҙе доға итеп ятлатырға ине лә бит.
Юбилярҙарға Башҡортостан Рес­публикаһы Президенты вазифаһын ваҡытлыса башҡарыусы Рөстәм Хә­ми­тов исеменән төрлө бүләктәр тапшырылды, шулай уҡ Стәр­ле­тамаҡ ҡалаһы хакимиәте башлығы­ның ҡот­лауы, яҡындарынан бик күп йылы һүҙҙәр һәм изге теләктәр яңғыраны.