Тимәк, кешеләрҙе бәләнән ҡотҡарыу, уларға ярҙам итеү теләге бәләкәйҙән килә. Әммә хыялдың шулай тиҙ арала тормошҡа ашырын ул уйлап та еткер­мәгәндер әле. Бер юлы өс кешене бәлә­нән йолоп алып ҡалыу – тәүәккәл булыу, ысын ҡотҡарыусылар һымаҡ эш итеү – күптәрҙең хәленән килмәй. Әйткәндәй, Аҡъярҙағы 2-се мәктәптең Х класын та­мамлаған Арсен Байғусҡаровтың исеме Хәйбулла районында яҡшы та­ныш.
Йәйгеһен Арсен класы һәм ата-әсә­ләр менән Таналыҡ буйына ял итергә сыға. Йылға буйында уйнап, һыу ингән­дән һуң, барыһы ла усаҡ янына йыйыла. Көнө буйы арығанлыҡтан, Арсен үҙе ҡорған ҡыуыш эсенә инеп серем итеп алырға була. Йоҡоға китеп барғанда ғына, әсәһенең ярҙам һорап ҡысҡыр­ға­нын ишетә. Йүгереп сығып, уның янына бара.
— Анауында кемдер бата түгелме, ул урында өйрөлтмәк бар, — тип ҡыуаҡ­лыҡ­тар артына күрһәтә.
Арсен шунда уҡ һыуға һикерә. Ысынлап та, ситтән ҡарағанда шаярып йөрө­гән кеүек күренгән ҡыҙҙар йәшәү менән үлем араһында ҡалған була. Хәлдең ҡурҡыныс икәнлеген төшөнгән үҫмер, улар янына йөҙөп килеп, тәүге ҡыҙҙы ярға ҡарай этеп ебәрә, әсәһе уға ярҙам­ға килә. Икенсе ҡыҙ һыу төбөнә киткән була. Арсен сумып, уны сәсенән тотоп ала. Һыуҙан саҡ һөйрәп сығарып, ярға яҡынайта. Оло тетрәнеү кисергәнгә күрә бөтөнләй аяғында баҫа алмаған өсөнсө ҡыҙҙы егет ярға үҙе күтәреп алып сыға.
Бына шулай өс кешенең ғүмерен һаҡ­лап ҡала ҡыйыу үҫмер. Ҡа­рап тороуға шундай тыныс күренгән малай­ҙың күңелендә, әйтерһең дә, эйәрле-йүгәнле ат ята.
Арсен Байғусҡаров Хәйбулла райо­ны хакимиәтенең һәм Башҡортостан Эске эштәр министрлығының Маҡтау ҡағыҙы менән бүләкләнгән.